ՀՀ կառավարությունն այսօր հավանություն տվեց «Ավիացիայի մասին» ՀՀ օրենքում փոփոխություն կատարելու մասին» օրենքի նախագծին։ Ինչպես նիստին նշեց ՀՀ էկոնոմիկայի փոխնախարար Սերգեյ Ավետիսյանը, օրենքի փոփոխությունը բխում է դեռևս 2013թ-ին կառավարության կողմից որդեգրված բաց երկնքի քաղաքականությունից։
«Նախագծի ընդունումը կնպաստի ՀՀ քաղաքացիական ավիացիայի ոլորտում կառավարման համակարգի արդիականացմանն ու արդյունավետության բարձրացմանը, առևտրային օդային հաղորդակցությունների իրականացման և հավաստագրման գործընթացի թափանցիկության ապահովմանը, միջազգային չափանիշների համապատասխանեցմանը՝ ոլորտում ձևավորվող իրավահարաբերությունների հստակ կանոնակարգմամբ»,-ասաց նա։
Փոխնախարարը նշեց, որ արդիականացվելու է նաև առևտրային օդային հաղորդակցությունների իրականացման հավաստագրման գործընթացը, մասնավորապես՝ տարանջատվելու են օրենքով սահմանված թույլտվություններ և հավաստագիր հատկացնող պետական կառավարման մարմինները։
«Օրենքի նախագիծը ուղարկվել է երեք խումբ իրարից անկախ փորձագետների քննությանը՝ USAID, Համաշխարհային բանկ, ինչպես նաև Եվրոպական հանձնաժողովի տրանսպորտի հարցերով հանձնակատար։ Հայաստան էր ժամանել փաստահավաք առաքելություն, որի հետ քննարկվել է օրենքի նախագիծը»,-ասաց նա և ընդգծեց, որ բոլոր դիտողությունները տեխնիկական բնույթի են։
Օրենքի նախագիծը վերջնական տեսքի բերելուց հետո կներկայացվի ԱԺ։
