Գերմանիայի Բունդեսթագի ՔԴՄ անդամ Ալբերտ Վայլերը ելույթ ունենալով «Ընդդեմ ցեղասպանության հանցագործության» գլոբալ ֆորումի ընթացքում, ասաց, թե մեծ պատիվ ունի հայերի հետ հիշելու Հայոց ցեղասպանության զոհերի հիշատակը, փոխանցել Բունդեսթագի նախագահի և անդամների ողջույնները:
«Օսմանյան կայսրության ներկայացուցիչները կոտորեցին հայերին, և դա ցեղասպանություն էր: Մենք տխրում և զայրանում ենք, որ թուրքական խորհրդարանի ճանաչումը դեռ չկա, չկա նաև բաց քննադատական անդրադարձը անցյալին:
Ոչ ոք այս ոճրագործությունը երբեք չի մոռանա»,- ասաց գերմանացի պատգամավորը՝ շարունակելով. «Մենք՝ գերմանացիներս, 20-րդ դարում մեծ մեղք բարդեցինք մեզ վրա՝ Հոլոքոստը: Բավարար պատճառներ կան մեզ հավերժ ատելու: Մենք բախտ ունեցանք տեսնելու, որ մեզ ներում են, մեզ հետ հաշտվում են: Դրա պատճառն այն է, որ մենք քննադատաբար ենք մոտենում մեր անցյալին»:
Գերմանացի պատգամավորի խոսքով՝ նա ով հակասում է մարդու իրավունքների հիմնարար օրենքներին՝ չի կարող եվրոպական ընտանիքի մաս լինել: «Թուրքիան պետք է ընդունի և դատապարտի իր անցյալը: Մենք քաջալերում ենք Թուրքիայի մտավորականներին, ովքեր դատապարտում են տեղի ունեցածը»,- ասաց Ալբերտ Վայլերը:
