Եվրամիությունը նոր պատժամիջոցներ է սահմանել Ղրիմի դեմ, ինչպե նաև՝ հայտարարել, որ չի ընդունում Ղրիմի մուտքը Ռուսաստանի կազմ: Այս մասին հայտնում է Interfax-ը:
Ըստ աղբյուրի՝ ԵՄ-ի անդամ երկրների արտգործնախարարների խորհուրդը համաձայնեցրել է Ղրիմի նկատմամբ նոր պատժամիջոցների փաթեթը: Այս մասին հայտարարել է ԵՄ-ի դիվանագիտության հարցերով գլխավոր հանձնակատար Ֆեդերիկա Մոգերինին:
Պաշտոնյան հստակեցրել է, որ նոր սահմանափակումները շրջանառության մեջ դնելու համար հարկավոր է «լրացուցիչ իրավական հիմք և տեխնիկական աշխատանք», իսկ այդ աշխատանքը այս ժամերին էլ ընթացքի մեջ է:
Մոգերինիի խոսքով՝ ԵՄ-ի անդամ երկրների արտգործնախարարների խորհուրդը միաձայն է ընդունել նոր փաթեթը: Նա հույս է հայտնել, որ մինչև վաղը կհամաձայնեցվեն պատժամիջոցների ընդլայնման հետ կապված բոլոր մանրամասները, իսկ պատժամիջոցների մասին կհայտարարվի՝ նախքան Եվրոպական խորհրդի առաջիկա նիստը, որը նախատեսված է այս հինգշաբթի: