Հայաստանի կառավարությունը փոքր տնտեսավարող սուբյեկտների համար 1 տարով կհետաձգի նոր սերնդի հսկիչ-դրամարկղային մեքենաների կիրառման պահանջը: Խորհրդարանը երկրորդ ընթերցմամբ քննարկեց «Հսկիչ-դրամարկղային մեքենաների կիրառման մասին» Հայաստանի Հանրապետության օրենքում փոփոխություն կատարելու մասին օրենքի նախագիծը: Հիմնական զեկուցող, ՀՀ ֆինանսների նախարարի տեղակալ Վախթանգ Միրումյանը նշեց, որ նախագծով առաջարկվում է փոքր տնտեսավարող սուբյեկտների համար նոր սերնդի ՀԴՄ-ների ներդրման ժամկետը 2015 թվականի հունվարի 1-ից հետաձգել մինչեւ 2016 թվականի հունվարի 1-ը:
«Դա հնարավորություն կտա ՀՀ կառավարությանը փոքր տնտեսավարող սուբյեկտների համար սահմանելու նոր սերնդի ՀԴՄ-ների ներդրման տարբերակված ժամկետներ եւ ապահովել նոր սերնդի ՀԴՄ-ի սահուն ներդրման գործընթաց»,- նշեց Միրումյանը:
Նա ընդգծեց, որ կառավարության կողմից կատարվել է օրենքի նախագծի ազդեցության գնահատման գործընթաց, որի արդյունքում պարզվել է, որ նախագծի ընդունման ազդեցությունը պետական բյուջեի եկամուտների վրա կլինի չեզոք:
