ԱԺ «Բարգավաճ Հայաստան» խմբակցության պատգամավոր Միքայել Մելքումյանն այսօր ԱԺ հայտարարությունների ժամին հանդես եկավ առաջարկով՝ ուղղված ՀՀ Նախագահ Սերժ Սարգսյանին՝ աջակցել տնտեսական մեծ ֆորումի անցկացմանը:
«Ունենալով վաթսունից ավելի տնտեսագետներ, պրոֆեսորներ, ունենալով մեծ ներուժ՝ տնտեսագիտական ու ինժեներական միտքը օտարված է ձեռնարկատիրական կոնկրետ իրավիճակից»,-ասաց նա ու առաջարկեց այս տարվա վերջին կամ հաջորդ տարվա սկզբին աննախադեպ միջոցառում անցկացնել:
Դա, պատգամավորի խոսքով, պիտի լինի հայկական տնտեսական ու ինժեներական, ճարտարապետական ֆորում, այն պիտի անցկացվի միասնական ուժերով ու մշակվի ապագա տեսլական՝ մինչև 2030-ի տնտեսական զարգացման համար:
Միքայել Մելքումյանը նշեց, որ այս հարցով դիմելու է նաև քաղաքական ուժերին, որոնք ևս պետք է ունենան միասնական ուղղվածություն այս հարցում. «Այլապես կառավարությունները կգան-կգնան, բայց իրավիճակը կմնա նույնը»:
