Այսօր կառավարությունը նպատակահարմար չհամարեց հավանության արժանացնել ՀՀ «Հայ ազգային կոնգրես» խմբակցության պատգամավոր Հրանտ Բագրատյանի ներկայացրած ««Հայաստանի Հանրապետության բյուջետային համակարգի մասին» Հայաստանի Հանրապետության օրենքում փոփոխություն կատարելու մասին» նախաձեռնությունը:
ՀՀ ֆինանսների փոխնախարար Վախթանգ Միրումյանը ներկայացրեց կառավարության եզրակացության հիմնավորումը: Նա նշեց, որ ներկայացված օրենքի նախագծով առաջարկվում է բյուջետային տարին սկսել հոկտեմբերի 1-ից և ավարտել սեպտեմբերի 30-ին և նախագծի հիմնավորման մեջ անդրադարձ է կատարվում միջազգային փորձին։
Փոխնախարարն ասաց, որ իրենք ևս ուսումնասիրել են միջազգային փորձը և նկատել են, որ չնայած կան այդպիսի երկրներ, սակայն ավելի շատ են այն երկրները, որտեղ բյուջետային տարին և օրացուցային տարին համընկնում են: Բացի այդ նա ասաց, որ վերոնշյալ և մի շարք երկրներում, որտեղ տարբերվում են բյուջետային և օրացուցային տարիները, հարկ վճարողների տարբեր խմբերի համար սահմանվում են հարկային տարիների տարբեր ժամկետներ՝ պայմանավորված ֆիրմաների գործունեության ոլորտների առանձնահատկություններով:
«ԵՏՄ և ԱՊՀ երկրներում բյուջետային և օրացուցային տարիները համընկնում են»,-ասաց նա և նկատեց, որ որոշ երկրներում նախկինում փոփոխված բյուջետային տարիները նորից համապատասխանեցրել են օրացուցային տարիներին, քանի որ մասնավոր հատվածը, այդ թվում՝ ձեռնարկություններն ու անհատները, հիմնականում իրենց գործունեության պլանավորումը կատարում են՝ հիմնվելով օրացուցային տարվա վրա:
«Հիմնավորման մեջ նշվում է, որ օրացուցային տարվա առաջին եռամսյակում, երբ տնտեսական ակտիվություն չկա, չեն ստացվում անհրաժեշտ եկամուտներ, որով պայմանավորված՝ բյուջետային ծրագրերի ամբողջական ֆինանսավորում չի իրակա-նացվում, ինչը իջեցնում է տնտեսության աճելու պոտենցիալը»,-ասաց նա և նշեց, որ անկախ նրանից՝ տարվա առաջին եռամսյակում համապատասխան հարկային եկամուտներ հավաքագրվե՞լ են, թե ոչ, այդ ժամանակահատվածում պետական բյուջեով նախատեսված ծրագրերի կատարման բնականոն ընթացքն ապահովելու համար բյուջետային ծախսերի անհրաժեշտ չափով ֆինանսավորում հնարավոր է իրականացնել նաև այլ միջոցների հաշվին:
Ի դեպ նշվեց, որ բյուջետային տարվա ժամկետների փոփոխությունը կվերաբերի ոչ միայն պետական կառավարման, այլ նաև տեղական ինքնակառավարման համակարգին և առօրյա աշխատանքում խնդիրներ կստեղծի տեղական ինքնակառավարման մարմինների գործնական աշխատանքում:
