Հարավային Կովկասի հարցերով Եվրամիութան հատուկ ներկայացուցիչ Հերբերտ Զալբերը այսօր Բաքվում հանդիպել է ոչ կառավարական կազմակերպությունների մի խումբ ներկայացուցիչների հետ: Ինչպես հաղորդում է contact.az-ը` հանդիպման ընթացքում նաև նրանց հետ կիսվել ԼՂ հարցի լուծման իր տեսլականով:
Զալբերը անհանգստություն է հայտնել, որ շփման գծում սուր վիճակը պահպանվում է և ափսոսանք հայտնել, որ միջնորդների ու կողմերի՝ հակամարտության լուծման բազմամյա ջանքերը առաջընթաց չեն գրանցել:
Առանց փոխզիջումների հակամարտության լուծումը հազիվ թե հնարավոր լինի, և Հայաստանում, Ադրբեջանում ու Ղարաբաղում անհրաժեշտ է շարունակել քաղաքացիական հասարակության շրջանում աշխատանքը՝ հաշտեցման ուղիների որոնման համար:
Անդրադառնալով ԵՄ-ի դերին՝ ԵՄ ներկայացուցիչը հայտնել է, որ Բրյուսելը պատրաստ է նպաստել նախագծերին ու միջոցառումներին՝ ուղղված վստահության և հակամարտող կողմերի միջև շփումների ամրապնդմանը:
Զալբերը սխալ է համարել Ղարաբաղյան հակամարտությունը մյուս հակամարտությունների հետ համեմատելը:
Հակամարտությունը ռազմական ճանապարհով լուծելու հարցին՝ Զալբերը պատասխանել է, թե դա չափազանց ռիսկային է ու ռազմական գործողությունների դեպքում «կպարտվեն բոլորը»:
