«Ազատության» փոխանցմամբ՝ Լեռնային Ղարաբաղի նորընտիր Ազգային ժողովում ներկայացված կլինի հինգ քաղաքական ուժ, որոնք կիրակի օրը անցկացված ընտրություններում հաղթահարել են նվազագույն՝ 5 տոկոսի շեմը:
Համամասնական ընտրությունների նախնական արդյունքներով, որոնք քիչ առաջ հրապարակեց Լեռնային Ղարաբաղի կենտրոնական ընտրական հանձնաժողովի նախագահ Սրբուհի Արզումանյանը, «Ազատ Հայրենիք» կուսակցությունը ստացել է քվեների 47․3, Արցախի ժողովրդավարական կուսակցությունը՝ 19․1, ՀՅ Դաշնակցություն կուսակցությունը՝ 18․81, «Շարժում 88» կուսակցությունը՝ 6․93 և «Ազգային վերածնունդ» կուսակցությունը՝ 5․38 տոկոսը:
Հիշեցնենք՝ «Ազատ Հայրենիք» կուսակցության առաջնորդը Լեռնային Ղարաբաղի վարչապետ Արայիկ Հարությունյանն է, Արցախի ժողովրդավարական կուսակցության ղեկավարը՝ գործող Ազգային ժողովի խոսնակ Աշոտ Ղուլյանը:
Ընտրություններին մասնակցող մյուս երկու կուսակցությունները՝ Լեռնային Ղարաբաղի կոմկուսը և «Խաղաղություն և զարգացում»-ը նվազագույն շեմը չեն հաղթահարել:
Մեծամասնական ընտրակարգով ընտրությունների նախնական արդյունքները կհրապարակվեն ավելի ուշ:
