ՀՀ Նախագահի աշխատակազմի հիմնական խնդիրներն են՝ պայմաններ ստեղծել Նախագահին վերապահված լիազորությունների իրականացման համար, ապահովել տարբեր ստորաբաժանումների պաշտոնատար անձանց մասնակցությունը օրինաստեղծ աշխատանքներին, փորձագիտական աշխատանքներին, օրենքների նախագծի քննարկումներին մասնակցությունը:
Այս մասին այսօր 2014 թվականի բյուջեի կատարողականի հաշվետվությանը հայտնեց ՀՀ Նախագահի աշխատակազմի ղեկավար Վիգեն Սարգսյանը։
Նրա տեղեկացմամբ՝ 2014 թվականին Նախագահի կողմից ստորագրվել է 489 օրենք, 170 պայմանագիր փորձաքննության է ենթարկվել, նախապատրաստվել ու ստորագրման է ներկայացվել 687 համաձայնագիր, 226 կարգադրություն, 911 ուղերձ:
Ինչպես նաև Վիգեն Սարգսյանը հայտնեց, որ 2014 թ-ի ընթացքում Նախագահը կատարել է 22 պետական, պաշտոնական ու աշխատանքային այց արտերկիր, հյուրընկալել Ֆրանսիայի, Վրաստանի, Սերբիայի, Ռուսաստանի նախագահներին, Հունաստանի, Շվեյցարիայի Համադաշնության նախարարին, ԵԱՀԿ գործող նախագահին, ընդունել է ՀՀ-ում ավելի քան 20 բարձրաստիճան պաշտոնատար անձանց։
Նախագահի և աշխատակազմի գործունեության լուսաբանման վերաբերյալ նախապատրաստվել է 605 հաղորդագրություն ԶԼՄ-ների համար, լրատվական դաշտի 501 վերլուծություն, Նախագահի պաշտոնական կայքում տեղադրվել է 937 նյութ, իսկ կայքի այցելությունների թիվը 2014թ-ին կազմել է 1 մլն 873 հազար 448:
Նախագահի կողմից շքանշաններով ու մեդալներով պարգևատրվել է 573 անձ, ՀՀ Նախագահի մրցանակներ են շնորհվել 15 անձի, երիտասարդական մրցանակ՝ 8 անձի, պատվավոր կոչումներ՝ 98 անձի:
