Ազգային ժողովում բյուջեի կատարողականի քննարկմանը ՀՀ սփյուռքի նախարար Հրանուշ Հակոբյանին ԱԺ «Բարգավաճ Հայաստան» խմբակցության ղեկավար Նաիրա Զոհրաբյանը իր մտահոգությունը հայտնեց՝ սփյուռքի հայ գաղթօջախներում հայոց լեզվի իմացության խնդրի վերաբերյալ:
Պատգամավորը նշեց թե նոյեմբերին ԱԺ պատվիրակության հետ եղել էր Հարավային Ամերիկայում՝ Ուրուգվայ, Բրազիլիա և այցի ընթացքում եղել են նաև հայկական վարժարաններում, դպրոցներում: «Զարմանալիորեն գերակշիռ մեծամասնության համար բարևն առավելագույնն էր, որ հայ երեխաները գիտեին: Ինչպե՞ս ենք փորձելու կարգավորել այս հարցը հեռավոր համայնքներում, շատ կարևոր, ստրատեգիական համայնքներում: Ադրբեջանը նաև այստեղ է սողոսկել, ակտիվ հակաքարոզչություն է իրականացնում: Ինչպե՞ս պետք է հային հայ պահենք, երբ բարևից բացի ոչինչ չգիտեն, էլ չեմ խոսում հայկական դասագրքերից»,- ասաց նա:
Հրանուշ Հակոբյանը պատասխանեց, թե կիսում է այդ կարծիքը: «Դա ամենաբարդ խնդիրն է, որ այսօր ծառացած է հայկական սփյուռքի առջև: 8 մլն հայերին եթե գումարենք ևս իսլամացած 2 մլն-ը, նրանց մեջ գնալով պակասում է հայերեն իմացողների թիվը, նաև պակասում է հայկական վարժարանում սովորողների թիվը»,- ասաց նախարարը և հավելեց, թե տարբեր պատճառներ կան, որից մեկն այն է, որ կողքը կան ֆրանսիական, անգլիական ավելի որակյալ դպրոցներ և ծնողներն ուզում են ավելի որակյալ ուսում տալ:
«Մյուս կողմից էլ մտածում են, որ այսօր հեռավոր տարածքներում հայերենն այդքան էլ պետք չէ, և ծնողներ կան, որոնք մտածում են, որ իրենց երեխաներին արագ ինտեգրեն»,- ասաց նա:
Նախարարը նաև նշեց, որ երրորդ խնդիրը խառն ամուսնություններն են: Մեկ այլ խնդիր է հեռավորությունը, և հայրենիք գալը ֆինանսական դժվարություններ է առաջացնում:
«Այնպես որ խնդիրը բազմավեկտոր է, և այդ առումով նախարարությունն իր կարևոր խնդիրը համարում է հայապահպանության խնդիրը»,- ասաց նա:
Հրանուշ Հակոբյանը նշեց, թե դա է պատճառը, որ «Հայ բարեգործական ընդհանուր միության» հետ միասին վիրտուալ քոլեջ են ստեղծել: «Բացի այդ, գտնում ենք, որ հայանալու, հայ ապրելու գլխավոր բանաձևը հայրենիքը տեսնելն է, և դա է պատճառը, որ մեծ տեղ ենք տալիս «Արի տուն» ծրագրին, և վստահ կարող եք լինել, որ նրանք, ովքեր մասնակցում են, էլի են ուզում իրենց ծնողի հետ հայրենիք գալ»,- ասաց նա:
Նախարարը նշեց, թե կարևոր ծրագիր է նաև Երևանի պետական համալսարանում ամառային դպրոցի բացումը: Նաև, ըստ նրա, մեծ տեղ է տրվում հայոց լեզվի ուսուցիչների վերապատրաստման ծրագրին և իրենք հարցը փորձում են լուծել ոչ թե սփյուռքի ուսուցիչներին այստեղ վերապատրաստելով, այլ լավ մասնագետներ ուղարկելով. «Արդեն մեկ լավագույն մասնագետի ուղարկել ենք Ավստրալիա, ով վերապատրաստում է 40-ից ավելի ուսուցիչների, նույնը նաև Լատինական Ամերիկա կուղարկենք, որը կվերապատրաստի 80 ուսուցիչների»:
Հրանուշ Հակոբյանը նաև նշեց, թե իրենք տարբեր կոչերով են հանդես գալիս, ինչպես օրինակ՝ Նախագահն էր անցյալ տարի ասել, որ տանը խոսեն հայերեն:
