PRNet ընկերությունը վերլուծել է 2015 թվականի ապրիլի 20-26-ն ընկած ժամանակահատվածում թուրքական մեդիայում ամենաշատը խոսված նյութերը, գրում է Medyatava թուրքական կայքը։
Ըստ այդմ՝ պարզվել է, որ Հայոց ցեղասպանության մասին ավելի շատ հրապարակումներ են եղել, քան Գալիպոլիի միջոցառումների։
Առաջատար հնգյակը գլխավորել են ապրիլի 23-ին նշվող Երեխաների օրվա մասին նյութերը, որին նվիրված 6.728 նյութ է եղել։
Հայոց ցեղասպանության մասին նյութերը երկրորդն են եղել։ Ցեղասպանության 100-ամյակի մասին գրվել է 2.404 անգամ։
Գալիպոլիի հաղթանակի 100-ամյակը հիշատակվել է 2.036 նյութում։
Դրան հաջորդել են Թուրքիայում կայանալիք խորհրդարանական ընտրություններից առաջ քաղաքական նյութերը։
Նշված ժամանակահատվածում լրատվամիջոցներն ամենից շատ անդրադարձել են Թուրքիայի նախագահ Ռեջեփ Թայիփ Էրդողանին։ Նրա անունը հիշատակվել է մոտ 4.000 հրապարակման մեջ։
Երկրորդը եղել է վարչապետ Ահմեթ Դավութօղլուն, իսկ երրորդը՝ ընդդիմադիր գործիչ, Ժողովրդահանրապետական կուսակցության նախագահ Քեմալ Քըլըչդարօղլուն։
