Կատարված ուսումնասիրությունները ցույց են տվել, որ Հայաստանում գործազրկությունը 21 տոկոս է կազմում: Այսօր լրագրողների հետ հանդիպման ժամանակ ասաց սոցիոլոգ Ահարոն Ադիբեկյանը:
«Գործազուրկների շարքերն են համալրում երիտասարդների մեծ մասը: Դրա հիմնական պատճառն այն է, որ գործատուն փորձառու աշխատողներ է պահանջում»,-նշեց սոցիոլոգը:
Նրա խոսքերով՝ գործազուրկների մեծ մասը բարձրագույն կրթություն ունեցող կանայք են, ովքեր չեն ցանկանում աշխատել սպասարկման ոլորտում. «Երիտասարդներն էլ ընտրում են մենեջերի, իրավաբանի, տնտեսագետի և մի շարք այլ մասնագիտություններ, որոնք աշխատաշուկայում պահանջարկ չունեն»:
Ադիբեկյանի դիտարկմամբ՝ շատերն աշխատանք չեն գտնում նաև տարիքի պատճառով, քանի որ 40-անց մարդկանց շատ տեղերում աշխատանքի չեն ընդունում:
«Գործազրկության պայքարի դեմ պետական ծրագիր չկա: Եվ եթե լուրջ պետական մոտեցում լինի այս խնդրին, գործազրկության դեմ կարելի է հեշտությամբ պայքարել»,-ավելացրեց սոցիոլոգը:
