Հայաստանում ավանդաբար անցկացվող Տոլմայի փառատոնի ժամանակ հայ խոհարարները պատրաստվում են ներկայացնել աշխարհի ամենաերկար տոլման, չորեքշաբթի լրագրողներին ասաց «Հայ խոհարարական ավանդույթների զարգացման և պահպանման» հասարակական կազմակերպության նախագահ Սեդրակ Մամուլյանը։
«Ուդուլի» տոլմայի հերթական հինգերորդ փառատոնը կանցկացվի մայիսի 16-ին ՀՀ Արմավիրի մարզում, Սարդարապատի հերոսամարտի հուշահամալիրի տարածքում։
«Փառատոնի նպատակն է տարածել և հանրաճանաչ դարձնել տոլման։ Մրցույթ կանցկացվի, որի ընթացքում կընտրեն ամենահամեղ տոլման, ամենալավ ձևավորված տոլման և ամենաերկար տոլման»,– ավելացրեց նա։
Սարդարապատի «Հայոց ազգագրության և ազատագրական պայքարի պատմության ազգային թանգարանի» տնօրենի տեղակալ Սվետլանա Պողոսյանն էլ ընդգծեց, որ միջոցառմանը ներկայացված ազգային ուտեստներն ու խմիչքները կարող են Հայաստանի ապրանքանիշը դառնալ։
