Ինչպես հաղորդում է ՏԱՍՍ գործակալությունը, Թայլանդի հարավային Յալա պրովինցիայում իրականացվել է 23 պայթյուն, ինչի հետեւանքով տարբեր աստիճանի վնասվածքներ են ստացել շուրջ 38 մարդ:
Պայթյունները տեղի են ունեցել պրովինցիայի տարբեր հատվածներում:
Հանցագործները գործի են դրել ոչ մեծ հզորության ինքաշեն պայթուցիկ սարքեր:
Իրավապահների կարծիքով, չարագործները նպատակ են հետապնդել խուճապ առաջացնել բնակչության շրջանում, պայթուցիկ սարքերը գործի են դրվել մարդաշատ վայրերում:
Ոստիկանության տվյալներով, ահաբեկչությունն իրականացրել են երկրի հարավում գործող մահմեդական անջատողականները, որոնք արդեն 10 տարի է գործում են հարավային շրջաններում:
Ցանկանալով, վերջ դնել հակամարտությանը, որին զոհ է գնացել 6 հազար մարդ, երկրի իշխանությունները, Մալազիայի միջնորդությամբ բանակցություններ են սկսել անջատողականների հետ:
Այդ նպատակով երկրի իշխանություններն աստիճանաբար հարավային շրջաններից դուրս են բերել զինված ուժերի զգալի մասը:
