NewsBook կայքը գրում է․
Վերջին օրերին կիբերհարձակման հետևանքով չգործող, սակայն արդեն այսօր աշխատանքների բնականոն ընթացքը վերականգնած Analitik.am կայքի խմբագիր Անի Հովհաննիսյանը համոզված է, որ կայքը կոտրվել էր գործածար Խաչատուր Սուքիասյանի պատվերով: Նման համոզմունք նա հայտնեց NewsBook-ի թղթակցի հետ զրույցում: «Կայքը կոտրելու պատվերի մեջ կասկածում են Խաչատուր Սուքիասյանին, այս մասին ասել եմ նաև ոստիկանությունում:
Վերջին շրջանում մենք անդրադարձել էինք նրա գործունեությանը, բացահայտումներ արել, որոնք վերաբերում էին Երևանի Օղակաձև զբոսայգում Սուքիասյանի կողմից հյուրանոց կառուցելուն: Նյութերի տակ հայհոյախառն մեկնաբանություններ և սպառնալիքների պարունակող մենկաբանություններ են եղել: Կայքը կոտրելու օրը ևս Խաչատուր Սուքիասյանի մասին նյութ ենք տեղադրել մեզ մոտ: Հենց այդ օրն էլ կատարվել է կիբեր հարձակումը»,- ասաց Անի Հովհաննիսյանը: Analitik.am կայքի խմբագրի խոսքով` կատարվածի առնչությամբ ինքը դիմել է ՀՀ ոստիկանություն:
Գործով այժմ զբաղվում է Ոստիկանության կազմակերպված հանցավորության դեմ պայքարի գլխավոր վարչության (6-րդ վարչություն) կիբեր հանցագործությունների բաժինը: «Ուզում եմ ասել, որ կայքն աշխատանքների վերականգնվելուն պես շարունակելու է շատ ավելի խորը կերպով բացահայտումներ անել այն անձանց գործունեության մասին, որոնց նախկինում անդրադարձել է»,- ասաց նա: Հակառակ կողմի տեսակետը լսելու համար մեր թղթակիցը զրուցեց նաև գործարար Խաչատուր Սուքիասյանի մամուլի քարտուղար Աննա Մկրտչյանի հետ, ով Անի Հովհաննիսյանի պնդումները որակեց որպես բանսարկություններ:
«Մենք բարձր ենք գնահատում մամուլի դերը և առողջ քննադատության կողմնակից ենք, իսկ ինչ վերաբերում է բանսարկություններին, կարծում եմ, անիմաստ է նման անհեթեթությունները մեկնաբանելը: Թող ոստիկանությունը պարզի ճշմարտությունը»,- ասաց նա: Դիտարկմանը, որ Անի Հովհաննիսյանի պնդմամբ, իր հետ հանդիպել է ոմն Ալեն, ով ներկայացել է որպես գործարարի մամուլի խոսնակ և պահանջել կայքից հեռացնել նրա մասին նյութերը, Աննա Մկրտչյանն արձագանքեց. «Պարոն Սուքիասյանի մամուլի խոսնակը ես եմ: Նա ում հետ է հանդիպում, ինչ հարցեր է քննարկում, ոչ տեղյակ եմ, ոչ էլ պարտավոր եմ մեկնաբանել»:
