Վերակառուցված Երևանի կենդանաբանական այգու և 2015 թ. սեզոնի պաշտոնական բացումը տեղի կունենա հունիսի 1-ին, հայտարարեց Երևանի փոխքաղաքապետ Արամ Սուքիասյանը։
«Հունիսի 1-ին տեղի կունենա վերակառուցված կենդանաբանական այգու հանդիսավոր բացումը։ Այդ օրը կկազմակերպվեն համերգային ծրագրեր և մրցույթներ։ Երեխաների մուտքն անվճար կլինի։ Սպասվում են բազմաթիվ անակնկալներ», –ուրբաթ մամուլի ասուլիսում ասաց Սուքիասյանը։
Նրա խոսքերով` առաջին փուլից հետո կենդանաբանական այգին ամբողջովին նորացված է։ Վերակառուցման երկրորդ փուլն մեկնարկելու է աշնանը և ծրագրված է Երևանի կենդանաբանական այգին դարձնել տարածաշրջանի լավագույն կենդանաբանական այգին։
Փոխքաղաքապետը նշեց, որ կենդանաբանական այգու տարածքում, որտեղ տեղակայված են մանկական ատրակցիոնները, այսուհետ կարելի է օգտվել անվճար։
Նա չբարձրաձայնեց կենդանաբանական այգու մուտքի տոմսի արժեքը, նշելով որ, երկուշաբթի և չորեքշաբթի օրերին այն ավելի մատչելի կլինի, քան մնացած օրերը։
Երևանի կենդանաբանական այգին հիմնադրվել է 1941 թ.։ Ներկա պահին հաշվառվում են այգու բնակիչների տեսակներն ու քանակը։
