«Երևանյան ամառ» եռամսյա միջոցառումների ծրագրով շրջակա միջավայրի համաշխարհային օրվան նվիրված Երևանի կենդանաբանական այգին վերածվել է բացօթյա արվեստանոցի: «Իմ տոհմածառը» գունանկարչության մրցույթի ընթացքում Երևանից և մարզերից հարյուրավոր պատանիներ պատկերել են Հայաստանի բնությունն ու մշակութային հուշարձանները:
«Խորհրդանշական այս խորագիրը ոչ միայն սեփական արմատները գտնելու, ոգեկոչելու յուրատեսակ կոչ է, այլև հղում՝ մարդ-բնություն խորքային կապին: Այս միջոցառումը նաև երևանաբնակ ու մարզերի երեխաների ամառային հանգիստն առավել հետաքրքիր ու բովանդակալից դարձնելուն է ուղղված», - նշել է Երևանի կենդանաբանական այգու տնօրեն Ռուբեն Խաչատրյանը:
Երևանի քաղաքապետարանի տեղեկատվության և հասարակայնության հետ կապերի վարչությունից հայտնում են, որ միջոցառումն ուղեկցվել է ազգային երգ ու պարի համերգային ծրագրով, անցկացվել են նաև հայկական ավանդական պարի բաց դասեր: Առանձին տաղավարներով ներկայացվել են երեխաների կրթական բազմազան ծրագրերի առաջարկներ:
Մրցույթի արդյունքները կամփոփվեն ամռան վերջին, հաղթողներն էլ կպարգևատրվեն արժեքավոր մրցանակներով, իսկ երեխաների նկարները կշրջանառվեն տպագիր և առցանց հրապարակումներում, ցուցահանդեսներում՝ դառնալով հայկական ամուր տոհմածառի գաղափարի տարածման դեսպանը:
