Հրանուշ Հակոբյանն իր հայտարարություներով դարձել է լրատվամիջոցների «հերոսուհիներից» մեկը, Սփյուռքի նախարարն իր վրա է սևեռել շատերի ուշադրությունը՝ հարուստ նյութ տալով հրապարակումների համար:
Ու եթե շատերը գրում են հատկապես սփյուռքահայերի 1000-ական դոլար բանկային ավանդադրումների մասին, ապա քչերին է հետաքրքրում, թե ինչպիսի նախարարություն է ստեղծել տիկին Հրանուշը և ովքեր են նրա կադրերը:
Հենց նախարարությունում շատերն են խոսում, որ այստեղ շատ քիչ են «պատահական» մարդիկ, մրցույթներով աշխատանքի անցածները: Տիկին նախարարն աշխատանքի է ընդունում հիմնականում տարբեր պաշտոնյաների կանանց, որդիներին ու դուստրերին: Ասենք, Սերժ Սարգսյանի աշխատակազմի ղեկավար Վիգեն Սարգսյանի կնոջը, Գեղարքունիքի մարզպետ Ռաֆիկ Գրիգորյանի աղջկան, և առհասարակ հզոր «թիկունք» ունեցողների:
Բայց, նրանցից զատ, նաև մեծ տեղ է հատկացվում քյավառցի լինելու հանգամանքին և նախկին կոմսոմոլներին, որոնց հետ ժամանակին աշխատել է նախարարը, ով ղեկավարել է Հայաստանի կոմերիտմիությունը:
Իհարկե, չմոռանանք նաև մեծահարուստների զավակներին:
Ասենք, Նայիրի Մկրտիչյանին, որի հայրը Հայաստանում զբաղվում է բնակարանային շինարարության մեծ բիզնեսով: Երևի նշանակումների այս սկզբունքն է պատճառը, որ նախարարության օգտակար գործողության գործակիցը չափազանց ցածր է, առանց նախարարի ոչինչ չի արվում, քանի որ աշխատակիցների մեծ մասը տարրական պատկերացում չունի Սփյուռքի և նրա առանձնահատկությունների մասին:
Նյութի աղբյուրը ` Newsbook.am
