Բարություն, անունդ մարդ է, իսկ այս դեպքում ճիշտ է ասել՝ բարության անունը ԲԺԻՇԿ է....
Հունվարի 25-ին «Երիտասարդ բժիշկների հայկական ասոցիացիան» Վանաձորի «Հույսի Տուն» ծերանոցում էր՝ բուժզննում և բուժօգնություն ցուցաբերելու նպատակով:
Այցի և առհասարակ «Երիտասարդ բժիշկների հայկական ասոցիացիայի» գործունեության մասին Analitik.am-ը զրուցեց «Երիտասարդ բժիշկների հայկական ասոցիացիայի» նախագահ Գևորգ Գրիգորյանի հետ:
-Ի՞նչ նպատակով է ստեղծվել և որքա՞ն ժամանակ է, ինչ գործում է «Երիտասարդ բժիշկների հայկական ասոցիացիան»:
Երիտասարդ Բժիշկների Հայկական Ասսոցիացիան ստեղծվել է 2013 թվականիդեկտեմբերի 17-ին, սակայն 2011թ.-ից առկա է եղել նախաձեռնող խումբ, որը իրականացրել է զանազան ավելի փոքր նախագծեր: Հաշվի առնելով նախաձեռնող խմբի մեծացումը, կայացվեց որոշում՝ստեղծել ասոցիացիա, որը իր հարկի տակ կմիավորի զանազան մասնագետների և կծառայի հայ ժողովրդի շահերին: Նպատակները շատ բազմազան են՝ չմանրամասնելով դրանք, ուղղակի ասեմ, որ նպատակների իրականացման արդյունքների մասին կտեղեկանան բոլորը:
-Ինչպե՞ս ծնվեց նախաձեռնությունը` անվճար բուժօգնություն և սպասարկում իրականացնելու:
«Օգնության Ձեռք» նախաձեռնությունն ծնվեց մեր ասոցիացիայի և MPMS ընկերության հիմնադիրների քննարկումների ընթացքում:
-Մի փոքր խոսենք դեպի Վանաձոր այցից: Ինչպե՞ս է իրականացվում նախաձեռնության ֆինանսավորումը:
-Նախաձեռնությունը չի ֆինանսավորվում ոչ մեկի կողմից: Սա մեր կամքն է և մենք ներկայումս լիովին անվճար մատուցում ենք, սակայն հետագա ավելի մանրամասն հետազոտման և բուժման համար պետք կլինի որոշակի հովանավորչություն, որի հայթհայթմամբ կզբաղվեն նախաձեռնող խմբի անդամները: Մեր նախաձեռնությունը բաց է ցանկացած համագործակցության համար, որը կնպաստի մեր ժողովրդի շահերին:
-Այցը դեպի Վանաձոր առաջի՞նն էր:
-Այո:
-Ի՞նչ տպավորություններով եք վերադարձել:
-Աշխատանքային թիմը վերադարձել է շատ լավ տպավորություններվ, այսինքն՝ նման օրինակելի հիմնարկություն, որտեղ տարեց մարդկանց նման խնամքով և հոգատարությամբ են վերաբերվում, դեռևս չեինք տեսել: Սակայն, բժշկական տեսանկյունից, հարկ է նշել, որ շատերը ունեն ավելի մանրամասն հետազոտման և բուժման խնդիրներ: Մոտ ժամանակներում արդեն իսկ կանրադառնանք այդ հարցերին:
-Անվճար բուժօգնության այցերը շարունակական կլինեն արդյո՞ք և որտե՞ղ սպասեն «Երիտասարդ բժիշկների հայկական ասոցիացիայի» անդամներին հաջորդ անգամ:
-Միանշանակ շարունակական կլինեն: Ցանկացած այցից առաջ մենք կտեղեկացնենք ակցիայի մասին: Ներկայումս ստեղծվում է այցերի քարտեզ՝ թե ինչ հերթականությամբ և որ հիմնարկությունները կայցելեն նախաձեռնության անդամները: Աշխատանքային թիմը ոչ միայն ծերանոցներ և մանկատներ է այցելելու, այլև անապահով ընտանիքներին է սպասարկելու, այդ իսկ պատճառով պետք է ավելի հստակ պլանավորել այցերը:
-«Երիտասարդ բժիշկների հայկական ասոցիացիայի» հետագա քայլերի մասին մի փոքր խոսենք: Առաջիկայում ի՞նչ անելիքներ ունեք:
-Մենք չենք խոսում մեր հետագա քայլերի մասին… Մենք գործում ենք...
Analitik.am-ը շնորհակալություն է հայտնում «Երիտասարդ բժիշկների հայկական ասոցիացիային»՝ հարցազրույցի համար և մաղթում նոր հաջողություններ՝ իրենց անձնվեր ու ազգանպաստ գործում: