Հեռուստեսային նախագծերը, կարծես, օգնում են բացահայտել շատ թաքնված երգիչների, ում մինչ այդ ոչ բոլորն են ճանաչել: www.analitik.am-ը զրուցեց հեռուստատեսային նախագծերից մեկին մասնակցած և արդեն շատերի կողմից սիրելի դարձած Նարեկ Մակարյանի հետ:
-Շատերը Ձեզ սկսեցին ճանաչել «Հայաստանի ձայնը» նախագծից, բայց մենք տեղյակ ենք, որ Դուք մինչ այդ էլ երգել եք և բավական երկար ճանապարհ եք անցել. կխոսե՞ք այդ մասին:
-Իմ երաժշտական ուղղին սկսել է 10 տարեկանից: Առաջին քայլերս արել եմ «Դո Ռե Մի» մանկապատանեկան երաժշտական ստուդիայում՝ Նադեժդա Սարգսյանի ղեկավարությամբ: Հասկանալով, որ երաժշտությունն ինձ համար է, և ես ինձ զգում եմ ինչպես ձուկը ջրում՝ որոշեցի շարունակել: «Դո Ռե Մի»-ում բավական լավ արդյունքներ էի գրանցում: Հասմիկ Կարապետյանի հետ զուգերգ երգելով՝ ավելի ոգեշնչվեցի ու հստակ որոշեցի, որ պետք է երգիչ-երաժիշտ դառնամ: Մինչև «Հայաստանի ձայն»-ին մասնակցելը, ես մասնակցել էի բազմաթիվ միջազգային մրցույթների, զբաղեցրել լավագույն հորիզոնականներ, մեր երկրի եռագույնը բարձրացրել էի մի շարք միջազգային հարթակներում, սակայն «Հայաստանի ձայն»-ի շնորհիվ ես ձեռք բերեցի ճանաչում: Հիմա արդեն ավարտել եմ Երևանի Կոմիտասի անվան պետական կոնսերվատորիան, իմիջայլոց գերազանցությամբ:) :
-Իսկ եթե չմասնակցեիք վերոնշյալ հեռուստատեսային նախագծին,ապա ինչպե՞ս պետք է գրավեիք լսարանի ուշադրությունը, մտածե՞լ եք այդ մասին:
-Բնականաբար տեսահոլովակներով: Ասեմ, որ մինչև այդ ես ունեի «Անձրև» երգի տեսահոլովակը, սակայն հենց հեռուստատեսային նմանատիպ նախագծերը ավելի արագ ճանաչվելու հնարավորություն են տալիս:
-Հիմա շատերն են երգում և փորձում երգիչ դառնալ, իսկ Նարեկ Մակարյան երգիչն ի՞նչ նոր ասելիք ունի:
-Ասելիքը շատ է, բայց ժամանակ է պետք, որ այդ ամենը երևա, տեսանելի լինի:
-Իսկ երաժշտական ո՞ր ուղղվածությունն է Ձերը:
-ՓոՓ երաժշտությունն է իմը: Երաժշտական ուղղվածություններից ոչ բոլորն են Հայաստանում տարածված ու ընկալելի, օրինակ՝ այստեղ դեռ այդքան սիրված չէ էլէկտրոնային երաժշտությունը, որը Եվրոպայում լայնածավալ կիրառվում է:
-Սկզբում խոսեցինք միջազգային մրցույթներից, ի՞նչ հաղթանակներ եք ունեցել, կմանրամասնե՞ք:
-Միջազգային մրցույթներից կարող եմ նշել Ա. Բաբաջանյանի անվան միջազգային մրցույթ-փառատոնը, որտեղ «Գրան Պրի»–ին եմ արժանացել: Նաև կարող եմ մտաբերել «Славянский базар» միջազգային մրցույթը, որտեղ արժանացել եմ հատուկ մրցանակի, որն իրենից ներկայացնում էր տեսահոլովակի և ձայնասկավառակի թողարկում: Նաև մասնկացել եմ «Дельфийские игры» մրցույթին, որտեղ արծաթե մեդալ ստացա: Այլ մրցույթների ևս եմ մասնակցել եմ, բայց, թերևս, այսքանը կնշեմ:
Արմինե Բրսոյան
