«Ելք չկա» ֆիլմին www.analitik.am-ն անդրադարձել էր Կաննի 67-րդ միջազգային փառատոնի կինոշուկա մեկնելուց առաջ: Կաննիում ֆիլմի գրանցած հաջողությունների մասին մենք զրուցեցինք ֆիլմի պրոդյուսեր, գլխավոր դերակատար Կամո Ունանյանի հետ, ով նաև ներկայացրեց վերջին շրջանի իր մարզական ձեռքբերումը:
-Կաննի փառատոնի կինոշուկային մասնակցությունն ի՞նչ տվեց ֆիլմին:
-Կաննի փառատոնը մեծացրեց ֆիլմի ճանաչվածության շրջանակը: Այնտեղ ֆիլմը նոր հաջողություններ գրանցեց, ստացանք բազմաթիվ հրավերներ տարբեր կինոփառատոններից, օրինակ՝ Սալոնիկի, Մալագայի և Ռոտերդամի կինոփառատոններից: Ասեմ, որ բացի կինոփառատոններից նաև ֆիլմը կցուցադրվի Ռուսաստանի տարբեր քաղաքներում, ինչպես նաև Ղազախստանում, Հունաստանում և Վրաստանում:
-Իսկ նշված կինոփառատոններից որի՞ն կմասնակցի ֆիլմը:
-Սալոնիկի կինոփառատոնին միանշանակ կմասնակցի, քանի որ այնտեղ մրցութային ծրագում է ներկայացվելու, ինչը ինձ համար շատ կարևոր է: Ցանկացած բնագավառում սիրում եմ ոչ միայն ուղղակի մասնակցել մրցույթների, այլ մրցանակային տեղեր գրավել: «Մասնակցությունն արդեն հաղթանակ է» կարգախոսն այդքան էլ իմը չէ, և այդ իսկ պատճառով Սալոնիկի կինոփառատոնից ակնկալիքներ ունեմ:
-Հաղթանակներից խոսեցիք, որքանով, որ տեղյակ ենք վերջերս մարզական կարիերայում ևս մի հաղթանակ գրանցեցիք:
-Այո Եվրոպայի սպորտային կարատեի մրցաշարի գրանտ պրիին արժանացա և այս տարի ես, որպես մարզիկ, դեռ մի քանի մրցման պետք է մասնակցեմ՝ ձգտելով բարձրացնել Հայաստանի դրոշը: Սեպտեմբերին մեկնելու եմ Ստամբուլ մրցման համար:
- Ստամբուլում ի՞նչ մրցման եք մասնակցելու, և արդյոք այնտեղ հոգեբանական արգելքներ չեն լինում:
- Սեպտեմբերի 7-ին և 8-ին Համաշխարհային սպորտային կարատեի ֆեդերացիայի պրեմիեր լիգա պետք է լինի: Նախկինում 2 անգամ այնտեղ մասնակցել եմ մրցման, բայց անարդարացի վերաբերմունք է եղել: Այս անգամ ես որոշել եմ այնքան լավ պատրաստված գնամ, որ մրցման դատավորները կառչելու տեղ անգամ չունենան: Իմ հաղթանակը բացահայտ պետք է լինի: Հոգեբանական արգելքներ լինում են, բայց ես իմ հոգեբանն եմ և միշտ ուժ գտնում եմ իմ մեջ:
- Լավ, իսկ ինչի՞ց կարող է կոտրվել Կամո Ունանյանը:
- Յուրաքանչյուր մարդու կյանքում էլ դժվար պահեր լինում են, բայց մարդ պետք է ունենա կամքի ուժ: Ֆիլմի հետ կապված դեռ այնպիսի անհաջողություն չի եղել, որ կոտրվեմ, բայց 20 տարվա մարզական կարիերայիս ընթացքում բազմաթիվ դժվար իրավիճակներ են եղել, որոնք ես հաղթահարել եմ: Ամեն ինչ եղել է իմ մարզական կյանքում թե՛ հաղթանակներ, թե՛ պարտություններ, թե՛ կրիտիկական պահեր, որ արդեն պետք է վերջնական դադարեցնեի մարզիկի կարիերաս, բայց ես շատ մեծ կամքի ուժ ունեմ: Ընկնելուց հետո մարդը ոչ միայն պետք է կանգնի, այլ ավելի մեծ քայլերով գնա առաջ:
- «Ելք չկա» ֆիլմի գլխավոր հերոսը նույպես մարզիկ է, կարելի՞ է ենթադրել, որ Դուք Ձեզ եք մարմանավորել ֆիլմում: Ինչո՞ւ որոշեցիք ինքներդ հանդես գալ գլխավոր դերում:
- Իմ և գլխավոր հերոսի միջև շատ նմանություններ կան, բայց ես ամեն կերպ փորձել եմ կերպարին մարմանավորել: Հնարավոր է հաջորդ ֆիլմում ես չնկարահանվեմ, քանի որ ես ճանաչվելու համար չեմ խաղացել դերը: Ասեմ, որ նախապես գնացել եմ դերասանական դասերի, որ կարողանամ լավ խաղալ: Իդեպ, որոշված էր՝ եթե ես չկարողանայի լավ մտնել կերպարի մեջ, ապա ինձ ռեժիսորն անկեղծորեն պետք է ասեր այդ մասին:
-Ե՞րբ կնկարահանվի հաջորդ ֆիլմը:
- Դեռ հստակ ոչինչ չկա, բայց հնարավոր է՝ մյուս տարի ապրիլին կամ մայիսին: Երբ, որ զգամ արդեն ժամանակն է,ապա ջանքեր չեմ խնայի, որ լավ ֆիլմ նկարահանվի: Կարևորը որակյալ լինի, անգամ այս մի ֆիլմից էլ ավելի լավը:
-Իսկ ի՞նչ ֆիլմեր եք սիրում դիտել, կնշե՞ք մի քանիսը:
-“Пророк”, “Еффект бабочки 2’’ և “Неприкасаемые” : Իմ կարծիքով այդ երեք ֆիլմն էլ բավանակ ստացված են ու դիտարժան:
Արմինե Բրսոյան