Պաշտպանության նախարար Սեյրան Օհանյանին այսօր ԱԺ–ում լրագրողները հարցրեցին նրա կնոջ մասին հրապարակումներից։
Սեյրան Օհանյանը տեղեկացրեց, որ իրենք դիմել են համապատասխան ատյաններին, այդ թվում և դատախազությանը, և գործը կամաց-կամաց բացահայտվում է:
«Ես նման դեպքերում զգացմունքներին չեմ տրվում, ինչպես և պատերազմում՝ ես սառնասիրտ եմ գործում, և այս դեպքում էլ»,- ասաց նախարարը:
Հարցին, թե կան տեղեկություններ, որ նախարարը դառնալու է ՀՀ Նախագահի իրավահաջորդը, Սեյրան Օհանյանը նշեց, որ ինքը ներկայումս պաշտպանության նախարարն է, և առաջարկեց ապրել այսօրվա իրականությամբ:
«Եկեք ապրենք այսօրվա իրականությամբ և այն պատասխանատվությամբ, որը կրում է ՊՆ-ն, նախևառաջ այսօր ես կառավարման համապատասխան ոլորտում իմ տեղն ունեմ, ես հպարտանում եմ, որ Հայաստանի Հանրապետության պաշտպանության նախարարն եմ, իմ ուսերի վրա դրված է չափազանց մեծ պատասխանատվություն, ընդ որում՝ ձեզ հետ, ժողովրդի հետ միասին, և այդ պատասխանատվությունը ես կրում եմ, պետք չէ այլ բաների մասին մտածել»,- ասաց Սեյրան Օհանյանը:
Հարցին, իսկ պատկերացնո՞ւմ է իրեն այդ պաշտոնում, նախարարը հարցին հարցով պատասխանեց. «Ի՞նչ եք ուզում դրանով ասել, ես էլ ձեզ եմ հարց տալիս»:
