Հրապարակ» թերթը գրում է. ««Օօօ, ոչ, ես հասարակական գործունեությամբ եմ զբաղված»,- մեր հարցից անակնկալի եկած՝ հայտարարեց Ռոբերտ Քոչարյանի եղբոր դուստրը՝ Երևանի ավագանու ԲՀԿ անդամ Իրինա Քոչարյանը, երբ հետաքրքրվեցինք պատգամավոր դառնալու նրա ցանկության մասին։ Իսկ մինչև Ձեր կյանքի վերջը հասարակական գործունեությա՞մբ եք զբաղվելու։ «Ժամանակը ցույց կտա»,- ասաց Ի․ Քոչարյանը։
Իրինայի՝ որպես հաջորդ խորհրդարանի անդամության թեկնածուներից մեկի մասին խոսակցություններն ակտիվացել են Ռոբերտ Քոչարյանի քաղաքական հավակնությունների համատեքստում։ Ըստ լուրերի, երկրորդ նախագահը ցանկանում է իր քաղաքական ծրագրերում հույսը դնել իր հարազատներից ձևավորվող թիմի վրա, քանի որ անցած քաղաքական զարգացումներում նրա համախոհներից շատերը ճամբարափոխ եղան, Ծառուկյանն էլ ընդհանրապես դուրս եկավ քաղաքականությունից։ Տեղյա՞կ է հորեղբոր ծրագրերից, և հնարավո՞ր է իր առաջադրվելը նաև Քոչարյանի թելադրանքով լինի։ «Ոչ, ոչ, ես ընդհանրապես ազատ եմ իմ ընտրությունների մեջ, տակ շտո, ընդհանրապես ոչ մի կապ չունի»,- ասաց Իրինան ու փորձեց շրջանցել հորեղբոր թեման։
Մինչդեռ հասարակական ասպեկտում նրա առաջընթացը կապվում է հենց հորեղբոր անվան հետ, մանավանդ որ ավագանու գեղեցիկ ներկայացուցիչը երբևէ աչքի չի ընկել ակտիվությամբ, և նիստերի ընթացքում իր միակ առաքելությունը ներկաների ուշադրությունն իր սլացիկ քայլքով շեղելն է»:
Մանրամասները` թերթի այսօրվա համարում:
