ԱՄՆ նախագահ Բարաք Օբաման հաստատել է «Իրաքի և Լևանտի իսլամական պետության» դեմ պայքարի շրջանակում Իրաք ամերիկացի ևս 450 զինվորական հրահանգիչ ուղարկելու որոշումը: Այս մասին հայտնում է «Իտար-տասս»-ը:
Սպիտակ տան տարածած հաղորդագրության մեջ նշվում է, որ զինվորական կոնտինգենտն ուժեղացնելու որոշումն ընդունվել է` ելնելով «ԱՄՆ պաշտպանության նախարար Էշթոն Քարտերի և ԱՄՆ զինուժի շտաբի պետերի կոմիտեի նախագահ, գեներալ Մարտին Դեմպսի խորհուրդներից»:
Բացի այդ, համապատասխան խնդրանքով դիմել էր Իրաքի վարչապետ Հեյդար Ալ-Աբադին:
Սպիտակ տան մամուլի խոսնակ Ջոշ Էրնստի խոսքով, զինվորական հրահանգիչների լրացուցիչ խումբը տեղակայվելու է Անբար նահանգի «Ալ-Թակադում» բազայում և ռազմական դերակատարում չի ունենալու:
Նշենք, որ այս պահին Իրաքում գտնվում է մոտ 3100 ամերիկացի զինվորական:
