Մայրաքաղաքի 2014 թվականի զարգացման ծրագրով վարչական շրջաններում իրականացվող աշխատանքներին տեղում հետևելու նպատակով Երևանի քաղաքապետ Տարոն Մարգարյանի աշխատանքային հերթական շրջայցը Նոր Նորք վարչական շրջանում էր: Վարչական շրջանի ղեկավարի ուղեկցությամբ քաղաքապետ Տարոն Մարգարյանն այցելել է Միկոյան և Գալշոյան փողոցների խաչմերուկին հարող տարածք, որտեղ Երևանի քաղաքապետարանի և ՄԱԿ-ի զարգացման ծրագրերի հայաստանյան գրասենյակի հետ համատեղ իրականացվող «Գեղեցիկ Երևան» ծրագրով կատարվում են այգու հիմնանորոգման աշխատանքներ: Շուրջ 6 հեկտար ընդհանուր տարածքով այգին բարեկարգման համալիր ծրագրի իրագործումից հետո կունենա շատրվան, կանաչ ամֆիթատրոն և կանաչ բավիղ: Տարածքում կտեղադրվեն զրուցարաններ, նստարաններ, կկահավորվի մանկական երեք և թենիսի երկու խաղահարթակներով: Շատրվանից բացի այգում կլինեն նաև ցայտաղբյուրներ: Ամբողջ տարածքը կլուսավորվի ինքնատիպ 150 լուսամփոփով: Կգործի նաև սանհանգույց: Այգին նախագծված է հաշվի առնելով հասարակության սակավաշարժ խմբերի տեղաշարժման համար անհրաժեշտ պայմանները։
Նոր Նորք վարչական շրջան կատարած աշխատանքային շրջայցի ժամանակ Երևանի քաղաքապետ Տարոն Մարգարյանը ծանոթացել է նաև Երևանի քաղաքապետարանի շինբարեկարգման այս տարվա ծրագրով իրականացված բակերի բարեկարգման, ինչպես նաև խաղահրապարակների կառուցման աշխատանքներին. Վարչական շրջանի ղեկավարի և բնակիչների հետ քաղաքապետ Տարոն Մարգարյանը մասնակցել է 5-րդ զանգվածի Գալշոյան 8 հասցեում գտնվող բակի բացմանը՝ ծանոթանալով կատարված աշխատանքներին: Ի դեպ, բնակիչների համար օրը կրկնակի տոնական էր. բակը նշել է շենքերի կառուցման 40-ամյակը: Տարածքը հիմնովին բարեկարգվել և ապահովվել է բնակիչների հանգստի կազմակերպման համար անհրաժեշտ բոլոր պայմաններով, այդ թվում՝ ինչպես փոքրերի, այնպես էլ մեծահասակների համար: Բակում տեղադրվել են նստարաններ, կառուցվել է փոքրիկ շատրվան: Բակի հարակից շինությունների պատերն էլ ամբողջությամբ նկարազարդվել և ձևավորվել են:
Նոր Նորք վարչական շրջան կատարած աշխատանքային շրջայցի ընթացքում քաղաքապետ Տարոն Մարգարյանը վարչական շրջանի ղեկավարի ուղեկցությամբ այցելել է քաղաքապետարանի ենթակայության Սարգիս Ասլամազյանի անվան թիվ 1 երաժշտական դպրոց, որտեղ ընթանում են հիմնանորոգման աշխատանքներ: Ավելի քան 450 սան ունեցող կրթօջախի համար նորոգումն առաջնային անհրաժեշտություն էր: Հիմնանորոգվում են բոլոր դասասենյակները, միջանցքներն ու դահլիճը: Ամբողջությամբ փոխվում է նաև մանրահատակը:
Այնուհետ Տարոն Մարգարյանն այցելել է քաղաքապետարանի ենթակայության թիվ 106 մանկապարտեզ, որտեղ շրջել և հետևել է Երևանի 2014 թվականի շինբարեկարգման ծրագրերով իրականցվող հիմնանորոգման և մասնակի նորոգման աշխատանքներին: Պատասխանատուները, քաղաքապետին ներկայացնելով կատարվող աշխատանքները, զեկուցել են, որ հիմանորոգվում է մանկապարտեզի տանիքը, սանհանգույցները: Փոխվում են նաև դռներն ու պատուհանները: Քաղաքապետ Տարոն Մարգարյանը, շրջելով և ծանոթանալով հիմնանորոգման ընթացքին, բոլոր պատասխանատուներին հանձնարարել է հատուկ ուշադրություն դարձնել որակին և սահմանված ժամկետների պահպանմանը:
Քաղաքապետն այցելել և հետևել է նաև Նոր Նորքի 6-րդ զանգվածի կասկադատիպ համալիրի վերակառուցման ծրագրով ընթացող աշխատանքներին, որի շնորհիվ աստիճանահարթակների միջև ստեղծված առանձին տարածքն ամբողջությամբ կծաղկապատվի և համապատասխան ձևավորում կստանա:
Երևանի քաղաքապետ Տարոն Մարգարյանը Նոր Նորք վարչական շրջանի ղեկավարի ուղեկցությամբ ծանոթացել է նաև Գայի արձանի անմիջապես դիմացի հատվածում գտնվող շատրվանի հարակից այգու բարեկարգման աշխատանքներին: Ներկայացնելով տարածքի նախկին տեսքը և ըստ նախագծի կատարվող փոփոխությունները՝ պատասխանատուները նշել են, որ ծրագրի ամբողջացումից հետո հանգստի այս գոտին ևս կդառնա երևանցիների և, մասնավորապես, նորնորքցիների զբոսանքի սիրված վայրերից մեկը՝ սալիկապատված հարմարավետ ճեմուղիներով, արտաքին լուսավորությամբ և երևանյան ընդհանուր ոճին համահունչ կահավորմամբ:
