Վրաստանի ՆԳՆ-ն չի հաստատում Թբիլիսիի Ռիգայի փողոցում վագրի հայտնաբերման մասին լուրը, որը փախել էր Թբիլիսիի կենդանաբանական այգուց, մինչդեռ այգուց պնդում են, որ ևս երկու կենդանու ճակատագիր անհայտ է:
Ինչպես հաղորդում է Корреспондент-ը` ականատեսներից ստացված հաղորդումից հետո Ռիգայի փողոցի տարածքը մեկ ժամվա ընթացքում շղթայապատվել է և ստուգվել ոստիկանների և հատուկ ջոկատայինների կողմից, որից հետո շրջափակումը հանվել է:
Միևնույն ժամանակ վրացական «Իմեդի» հեռուստաալիքի ուղիղ եթերում տեղի բնակչուհիներից մեկը հայտարարել է, որ տեսել է վագրին իրենից մի քանի մետր հեռավորության վրա, սակայն վերջինս փախել է:
Ավելի վաղ հաղորդվում էր, որ նույն շրջանում անցած գիշեր բորենի են տեսել: Թբիլիսիի կենդանաբանական այգուց հաստատել են, որ դեռևս տեղեկատվություն չունեն վագրերից մեկի և մի բորենու գտնվելու վայրի մասին:
Ինչպես ավելի վաղ հաղորդվում էր՝ այսօր ջրհեղեղի ժամանակ այգուց փախած վագրերից մեկը հոշոտել է Թբիլիսիի պահեստներից մեկի աշխատակցին, որից հետո վագրին կրակել էին:
