800 երևանաբնակների 58 տոկոսը չի պատրաստվել որևէ բան անել էլեկտրաէներգիայի սակագնի թանկացման դեպքում, քանի որ անիմաստ է համարել: Այս մասին են վկայում «Gallup Internatiоnal» ասոցիացիայի հայաստանյան ներկայացուցչության կողմից մայիսի 21-31-ն անցկացված սոցիալական հեռախոսային հարցումները: Հարցման արդյունքները լրագրողներին ներկայացրեց «Gallup Internatiоnal» ասոցիացիայի հայաստանյան ներկայացուցչության նախագահ Արամ Նավասարդյանը:
Ի՞նչ միջոցառումներ կնախաձեռնեք կանխելու հնարավոր թանկացումները հարցին, ստացվել է հետևյալ պատասխանները` 20 տոկոսը՝ կմասնակցի ակցիաներին, 7 տոկոսը՝ կմասնակցի հանրային լսումներին, 3 տոկոսը՝ նստացույց կանի, 17 տոկոսը՝ կխնայի էլեկտրականության սպառումը, 58 տոկոսը ոչինչ չի ձեռնակի, քանի որ անիմաստ է համարում:
Հարցվածների 89 տոկոսը տեղյակ է եղել, որ «Հայաստանի էլեկտրական ցանցերը» դիմել է Հանրային ծառայությունները կարգավորող հանձնաժողովին՝ էլեկտրաէներգիայի սակագինը թանկացնել 17 դրամով: Հարցվածների 96 տոկոսը շատ վատ է վերաբերել էլեկտրաէներգիայի հնարավոր թանկացմանը:
Հարցման մասնակցիների 49 տոկոսը դժգոհ է ընկերության սպասարկման որակից, 51 տոկոսը՝ մատակարարման որակից:
Հարցվածների 63 տոկոսը պատասխանել է, որ տեղյակ չէ, թե ինչքան է էլեկտրաէներգիայի ներկայիս սակագինը, իսկ 88 տոկոսը նշել է, որ ներկայիս գինը բարձր է:
Հիշեցնենք, որ Հանրային ծառայությունները կարգավորղ հանձնաժողովը նախօրեին տեղի ունեցած նիստում մասնակի բավարարել է «Հայաստանի էլեկտրական ցանցեր» ընկերության հայտը. օգոստոսի 1-ից Հայաստանում էլեկտրաէներգիայի սակագինը կբարձրանա ոչ թե 17 դրամով, այլ 6,93 դրամով:
