ԱԺ արտահերթ նստաշրջանում առաջին ընթերցմամբ քվեարկության ներկայացվեց «Պետական պարտքի մասին ՀՀ օրենքում լրացումներ ու փոփոխություններ կատարելու մասին» ՀՀ օրենքի նախագիծը, որն ընդունվեց 63 կողմ, 32 դեմ և 2 ձեռնպահ ձայների քվեարկությամբ:
Երկրորդ ընթերցմամբ ընդունվեց նաև Կառավարության կողմից ներկայացված «Տավուշի մարզի Դիլիջան քաղաքային համայնքի և հարակից տարածքների զարգացման և ներդրումների խրախուսման մասին» օրենքի նախագիծը՝ 71 կողմ, 6 դեմ և 20 ձեռնպահ ձայներով:
Երկրորդ ընթերցմամբ 88 կողմ, 1 դեմ և 12 ձեռնպահ ձայներով ընդունվեց նաև «Ողջիի, Փխրուտի, Արծվանիկի պոչամբարներում կուտակվող, ինչպես նաև «Զանգեզուրի պղնձամոլիբդենային կոմբինատ» ՓԲԸ-ի գործունեության արդյունքում գոյացած և գոյացող արտադրական լցակույտերի մշակման ներդրումային ծրագրի մասին փաթեթը:
Մինչ քվեարկությունը վարման կարգով խոսեց «Բարգավաճ Հայաստան» խմբակցության պատգամավոր Միքայել Մելքումյանը, ով տեղեկացրեց, որ Տնտեսական հարցերի և այլ հանձնաժողովներում քննարկում է եղել ծրագրի ներդնող «Ալյոտիկ» ընկերության ներկայացուցիչների հետ. «Հիմնական մտահոգությունն այն էր, թե ռոյալտի պե՞տք է գանձվի, թե՞ չէ, և թափոնները ո՞ւմ սեփականությունն են հանդիսանում։ Իրենք պնդեցին, որ օրենսդրական նախաձեռնության ներքո միայն կկատարեն ներդրումները, պետք է թույլ տալ, որ այս պայմաններում այդ ներդրումները լինեն»,-ասաց նա՝ հավելելով, որ կողմ կքվեարկեն:
Վարման կարգով խոսեց նաև ՀՀԿ-ական Արայիկ Հովհանիսյանը՝ հաստատելով ԲՀԿ-ական պատգամավորի տեղեկությունը հանդիպման մասին. «Իսկապես եղել է հանդիպումը, որոշակի փոփոխություններ են ներկայացված, այն պատրաստ է երկրորդ ընթերցմամբ ընդունելու»,-ասաց նա:
