Չինաստանի Ժողովրդական Հանրապետություն կատարած պետական այցի շրջանակներում ՀՀ Նախագահն այսօր հանդիպում է ունեցել ՉԺՀ Նախագահ Սի Ծինփինի հետ:
Բանակցությունների արդյունքում կողմերը ստորագրել են «Հայաստանի Հանրապետության և Չինաստանի Ժողովրդական Հանրապետության բարեկամական համագործակցության հարաբերությունների հետագա զարգացման և խորացման մասին» համատեղ հռչակագիր:
Մեկ տասնյակից ավել փաստաթղթեր են ստորագրվել, որոնք վերաբերվում են ամենատարբեր ոլորտների:
Կարևոր է այն հանգամանքը, որ կնքված հռչակագրի համաձայն, Չինական կողմը խրախուսում և աջակցում է իր ձեռնարկություններին Հայաստանի Հանրապետությունում ներդրումներ անելու և ձեռնարկություններ ստեղծելու հարցում:
Չինական կողմը կմասնակցի մեր երկրի այնպիսի բնագավառներում կառուցմանն ու զարգացմանը, ինչպիսիք են գյուղատնտեսությունը, տրանսպորտը, էներգետիկան, կապը, առողջապահությունը, ենթակառուցվածքները և այլն:
Նախագահ Սերժ Սարգսյանի դեպի Չինաստանի Ժողովրդական Հանրապետություն կատարած պետական այցը կավարտվի մարտի 28-ին:
