Մարզերում լավ չէ փաստաբանների վիճակը, և շատ մարզերում փաստաբանները գործունեություն են ծավալում նվաստացուցիչ պայմաններում՝ չունենալով գրասենյակներ: Շատ անգամ եղել են դեպքեր, երբ փաստաբաններին հաճախորդներն անգամ փորձել են բնամթերքով փոխհատուցել:
Այս մասին այսօր հայտարարեց ՀՀ փաստաբանների պալատի նախագահ Արա Զոհրաբյանը՝ իր պաշտոնավարման 100-րդ օրվա առիթով լրագրողների հետ հանդիպմանը:
Ասուլիսին հրավիրված էին նաև պալատի նախագահի երկու թեկնածուները. Տիգրան Աթանեսյանը չէր կարող մասնակցել, բայց իր դիտարկումները ներկայացրեց նամակով: Իսկ մյուս թեկնածուն՝ Կրոմվել Գրիգորյանը, ներկա էր ասուլիսին:
Փաստաբանների պալատը որոշակի համագործակցության ծրագիր ունի մարզպետարանների ու քաղաքապետարանների հետ, որը պատրաստվում է ներդնել:
«Որպես համագործակցության արդյունք՝ փաստաբաններին կտրամադրեն անվճար սենյակ՝ գրասենյակներ չունեցող փաստաբանների համար, իսկ ամսվա մեջ մեկ օր բնակիչներին նրանք անվճար իրավաբանական խորհրդատվություն կտրամադրեն»,-ներկայացրեց Արա Զոհրաբյանը:
Պալատը կառուցվածքային բարեփոխումների համատեքստում ծրագրում է մարզերում ունենալ համապատասխան համակարգողներ և պատասխանատուներ, որոնք ի մի կբերեն առկա խնդիրները և կներկայացնեն Պալատին:
Անցած 100 օրերի ընթացքում կատարված աշխատանքներ մի մասը վերաբերում էր պալատի գործունեության թափանցիկությանը:
Այժմ Պալատի խորհրդի և նախագահի որոշումները հրապարակվում են Պալատի կայքում, որը հնարավորություն է տալիս առցանց հետևել պալատի խորհրդի նիստերին, ինչը, ըստ Արա Զոհրաբյանի, կտա 2 առավելություն:
«Առաջին, Պալատի խորհրդի անդամների մոտ զսպվածություն կառաջացնի, որ նիստերը չանեն տնավարի, նաև՝ փաստաբաններն էլ կիմանան՝ ինչով են զբաղվում իրենց ներկայացուցիչները»,-նշեց Պալատի նախագահը: Կայքում պարբերաբար տեղադրվում են նաև ֆինանսական հաշվետվություններ, որոնք շարքային քաղաքացուն հնարավորություն են տալիս տեղեկանալ, թե ինչ մուտքեր և ելքեր են եղել ՓՊ-ում:
«Ցանկացած քաղաքացի կարող է իմանալ, թե ինչ է կատարվում Պալատում՝ ֆինանսական-տնտեսական մասով»,-ասաց Արա Զոհրաբյանը:
Արա Զոհրաբյանն առանձնացրեց վարվող կադրային քաղաքականությունը, որի հիմնական գաղափարախոսությունն այն է, որ ցանկացած ոչ արհեստավարժ փաստաբանը չարիք է ինչպես պետության, այնպես էլ կազմակերպության համար՝ սկսած վարորդից:
Պալատում այս ընթացքում ներդրվել է ֆինանսական տնօրենի ինստիտուտը, որն իրականացնում է Պալատի ֆինանսատնտեսական քաղաքականությունը, զարգացել է մամլո խոսնակի ինստիտուտը, Պալատը ակտիվացել է նաև հանրային դաշտում:
Պալատի նոր նախագահը լուրջ ուշադրություն է հատկացնում արտաքին կապերին:
Առաջին պաշտոնական այցը Փաստաբանների պալատը կատարել է Լեռնային Ղարաբաղ, որտեղ ներկայացուցիչները հանդիպել են ԼՂ նախագահի, վարչապետի, Փաստաբանների պալատի նախագահի հետ: Ծավալված քննարկումների արդյունքում պայմանավորվածություն է ձեռք բերվել բարձրացնել ԼՂ փաստաբանների իրավակրթական մակարդակը:
Պայմանավորվածություններից մեկն այն է, որ Ղարաբաղի փաստաբանները պետք է սովորեն կամ վերապատրաստվեն ՀՀ փաստաբանական դպրոցում: ՓՊ-ն դա ծրագրում է իրականացնել՝ ներդնելով հեռահար ուսուցման մոդելը:
Այս տարվա դեկտեմբերի 7-ից Պալատն անդամակցում է Փաստաբանների միջազգային միությանը: