Ընդդեմ պարտադիր կուտակային կենսաթոշակային համակարգի ներդրման «Դ!ԵՄ ԵՄ» նախաձեռնության անդամներն այսօր մամուլի ասուլիս էին հրավիրել, տեղեկացնելու, որ այսօր ՀՀ կառավարության երրորդ շենքի դիմացից հավաք-երթ են անցկացնելու՝ ի նշան բողոքի:
«Սահմանադրական դատարանի հունվարի 24-ի որոշումից հետո կարիք կա նվաճելու մեր իրավունքը»,- ասաց քաղաքագետ Դավիթ Մանուկյանը:
Ասուլիսի մասնակիցներն ասացին, թե մի շարք կազմակերպություններ կան, որոնք հակառակ Սահմանադրական դատարանի որոշման, առանց աշխատակիցների կարծիքը հարցնելու արդեն պահումներ են արել նրանց աշխատավարձերից և նրանց ստիպում են, որպեսզի ընտրեն իրենց կուտակային կենսաթոշակների ֆոնդերի կառավարիչներին:
«Հարց ենք ուղղում այդ գործատուներին, իրենք ինչպե՞ս են փոխհատուցելու այն գումարները, որ առանց աշխատողի կարծիքը հարցնելու պահումներն արել են և փոխանցել ինչ-որ հիմնադրամների»,-ասաց Դավիթ Մանուկյանը՝ շարունակելով, թե ստեղծված քաոսի պատասխանատուն Կառավարությունն է:
«Դ!ԵՄ ԵՄ» նախաձեռնության անդամներն ասացին, թե երբ իրենք առաջարկել են եթերում բանավիճել օրենքի ներկայացուցիչների հետ, նրանք միշտ հրաժարվել են:
«Պետական այրերն ասում են, թե մենք՝ երիտասարդներս, էմոցիոնալ ենք, ծերության մասին չենք մտածում, բայց պետք է ասեմ, որ ամոթ է, երբ պետական այրն է նման հայտարարություն անում, մենք ավելի պրագմատիկ ենք, քան՝ իրենք»,- հայտարարեց Դավիթ Մանուկյանը:
Ասուլիսի մյուս բանախոս, ծրագրավորող Գևորգ Գորգիսյանն էլ իր հերթին տեղեկացրեց, որ ատոմակայանի և «Հայփոստի» աշխատակիցներն իրենց աշխատավարձերը ստացել են պահումներով: Գևորգ Գորգիսյանն ասաց նաև, որ ատոմակայանի 400 աշխատակիցներ արդեն ստորագրահավաք են կազմակերպել:
Բանախոսներն ասացին, որ Аզգային ժողովը ևս իր աշխատակիցներից արդեն պահումներ է արել: Կան մի շարք պատգամավորներ, ովքեր ընկնում են այդ օրենքի գործունեության տակ, սակայն նրանցից պահումներ չեն արվել:
«Կոչ ենք անում բոլոր պատկան մարմիններին՝ պաշտպանել իրենց աշխատակիցների շահերը»,- ասացին բանախոսները շարունակելով, որ փետրվարի 8- «Դ!ԵՄ ԵՄ»-ի նախաձեռնողները մեկնելու են Վանաձոր՝ մասնակցելու այնտեղ անցկացվելիք հավաք-երթին:
«Պատրաստ ենք և մեկնելու ենք բոլոր այն մարզեր, որտեղ նմանատիպ ակցիաներ կկազմակերպվեն»,- ասացին ասուլիսի բանախոսները: