Հանդուրժող չեն լինում այն մարդկանց նկատմամբ, ովքեր դուրս են գալիս հրապարակ ու կեղծ մեկնաբանություններ են տալիս: «Դեմ եմ» քաղաքացիական նախաձեռնության անդամ Հակոբ Արշակյանն այսօր` ապրիլի 5-ին, լրագրողների հետ հանդիպման ժամանակ այսպիսի պատասխան տվեց Արդարադատության նախարար Հրայր Թովմասյանին, որը նախաձեռնության անդամներին հանդուրժողականության կոչ էր արել:
«Հանդուրժող չեն լինում այն մարդկանց նկատմամբ, ովքեր մարդկանց ստրուկների նման ավտոբուսներով տանում են ֆոնդ ընտրելու: Հանդուրժող չեն լինում այն մարդկանց նկատմամբ, ովքեր դուրս են գալիս հրապարակ ու կեղծ մեկնաբանություններ տալիս: Հանդուրժող են լինում նրանց նկատմամբ, ովքեր անմիջապես ընդունում են ՍԴ-ի որոշումն ու անմիջապես չեղարկում նոր օրենքը»,- ասաց նա:
Նշենք, որ ապրիլի 3-ին կառավարության հերթական նիստի ժամանակ ՀՀ արդարադատության նախարար Հրայր Թովմասյանն ասել էր. «Սահմանադրական դատարանի մասին օրենքի 68-րդ հոդվածի 15-րդ կետն է, համաձայն որի, վերջին դրույթն եմ ուղղակի ուզում հնչեցնել, նման պարագաներում օրենքը համարվում է սահմանադրական մինչեւ նրա ուժը կորցնելը, այսինքն՝ այս պահի դրությամբ դա կոչվում է հակասահմանադրականության հանդուրժում տեսության մեջ, մինչեւ սեպտեմբերի 30-ը, դա վերջնաժամկետն է, որ այդ դրույթները համարվում են սահմանադրական: Բայց այն պահին, երբ այդ փոփոխությունները կկատարվեն, այդ պահից այդ փոփոխություններն արդեն կմտնեն ուժի մեջ: Դա ուղղակի վերջնաժամկետն է, այսինքն՝ այդ փոփոխությունները որ պահին անենք, այդ ժամկետը կկասեցվի, եւ հետեւաբար, նոր կարգավորումները կմտնեն ուժի մեջ:
