Մամուլի ակումբ 

ՀՊՃՀ մի խումբ դասախոսներ ուզում են բուհում աուդիտ նախաձեռնել

analitik.am

   Հայաստանի պետական ճարտարագիտական համալսարանի ֆիզիկայի ամբիոնի վարիչ, պրոֆեսոր Աշոտ Խաչատրյանն այսօրվա մամլո ասուլիսում հայտարարեց, որ համալսարանի աշխատակիցների աշխատավարձը նվազել է, իրենց աշխատանքն էլ ավելացել: «Երեկ մեզ մոտ պրոֆսայուզի նիստ եղավ: Կոլեկտիվից շատերի մոտ այնպիսի տպավորություն էր, որ բուհը, որպես կազմակերպություն, կանգնած է ֆինանսական կոլապսի առաջ, այսինքն` բանկրոտի շեմին է: Պարոն ռեկտորը ստիպված կրճատում է դասախոսների աշխատավարձը՝ խնդիրը լուծելու համար: Բայց դա արվում է բարեփոխումների շղարշի ներքո: Ռեկտորը փորձում է դոցենտների ու պրոֆեսորների քանակը նվազեցնել, քիչ վարձատրությամբ աշխատեցնել դասախոսներին»,- ասաց պրն Խաչատրյանը` հավելելով, որ փորձ է արվում համալսարանի ֆինանսական խնդիրները լուծել դասախոսների միջոցով՝ բարեփոխումների անվան տակ:
Աշոտ Խաչատրյանի խոսքով` պարզելու համար`արդյոք համալսարանն ունի ֆինանսական խնդիրներ, պետք է անցկացվի աուդիտ, իսկ դա կարող է անել միայն կառավարման խորհուրդը:
Ֆիզիկայի ամբիոնի վարիչը հերքեց այն խոսակցությունները, թե դասախոսները ռեկտորի դեմ ինչ-որ բան ունեն: «Երեկ՝ պրոֆսայուզի նիստում, ռեկտորի քաղաքականությունը քննադատեցին նաև նախկին երկու ռեկտորները»,- մանրամասնեց պրն Խաչատրյանը:
Համալսարանի աշխատակցի խոսքով` նոր ստորագրահավաք կսկսվի, որից հետո իրենք նամակ կուղղեն Արմեն Աշոտյանին և կառավարման խորհրդին, որում կքննարկվի նաև ռեկտոր Արա Ավետիսյանի լինել-չլինելու հարցը: 
Ի դեպ, նշենք, որ համալսարանում վախի մթնոլորտ է, շատերը հրաժարվում են միանալ ստորագրահավաքին` մտածելով, որ կկորցնեն իրենց աշխատանքը, որի պատճառն է ռեկտորի վարած քաղաքականությունը, ինչը զարմանալի չէ, քանզի պարոն Խաչատրյանը նշեց, որ ռեկտորը հպարտանում է նրանով, որ ժամանակին նկատողություն է արել Սիլվա Կապուտիկյանին, ով բացարձակ չէր սիրում անարդարություն, անազնվություն, ինչը վկայում է ռեկտորի կառավարման ոճի մասին:

Նույն շարքից