Այսօր «Անալիտիկ» կենտրոնում տեղի ունեցած ասուլիսի հյուրն էր Հայաստանի պանրագործների միության նախագահ Արմեն Գիգոյանը: Խոսելով Ռուսաստանի դեմ կիրառվող պատժամիջոցների մասին և հայկական պանրի արտահանման համար նոր հնարավորությունների մասին, բանախոսը նշեց. «Սանկցիան ժամանակավոր բնույթ կրող երևույթ է:
Այն հայտարարությունները, որ այսօր Հայաստանի համար հնարավորություն է ստեղծվել գյուղմթերք արտահանել, մի քիչ համարձակ հայտարարություններ են: Պետք է նշեմ, որ պանրի արտահանման առումով մենք դեռ պատրաստ չենք, քանի որ այսօր պանրի արտադրության ծավալը շատ փոքր է: Քանի որ մենք շատ քիչ քանակ ենք արտադրում` 20.000 տոննա, ապա հնարավոր է, որ արտահանման դեպքում Հայաստանում պանրի պակասորդ լինի: Մեզ անհրաժեշտ է արտադրության ծավալը մեծացնել:2009 թվականից այսպիսի հնարավորություններ Հայաստանի համար լինում են, սակայն, ցավոք, այսօր մենք դեռ պատրաստ չենք արտահանման»:
Խոսելով հայկական պանրի արտադրության ոլորտում առկա ներքին և արտաքին խնդիրների մասին, Գիգոյանը ասաց. «Այսօր պանրի արտահանմանը խանգարող կարևորագույն խնդիրը հումքն է՝ կաթի արտադրության ծավալը: Կաթի ծավալն անկանխատեսելի է, սեզոնայնությունից խիստ կախվածություն ունի և այժմ չկա որևիցե կենտրոնացված մոտեցում այդ հարցին լուծում տալու համար:
Անհրաժեշտ է՝ գործադիր ու օրենսդիր մարմինները նույնպես ներառված լինեն այս հարցին լուծում տալու գործընթացի մեջ, պետք է շատ կարգապահ լինենք, որպեսզի այս հիմնախնդիրը լուծվի և ապագայում ավելի մեծ հաջողություններ ունենանք: Առաջին խնդիրը կաթի արտադրության կարգավորումն է, պետք է անասնապահ գյուղացուն առանձնացնել ֆերմեից և նրանց հատուկ ստատուս տալ»:
Բանախոսը նշեց, որ Հայաստանում այսօր ամենաշատ պահանջարկ ունեցող պանիրները «Լոռի» և «Չանախ» պանիրներն են: Նա շեշտեց, որ պանրագործների մեծամասնությունը խելամիտ է և ներքին շուկան չի փոխի արտաքին շուկայի հետ. «Եթե գործարարը տեղական շուկայից դուրս գա, ապա հետագայում շատ դժվար կլինի նույն շուկա մտնելը»:
