«Հայաստանում ներքաղաքական զարգացումներն ինձ ալևս հետաքրքիր չեն: Ես ավելի շատ հետևում եմ Ուկրաինայի դեպքերի զարգացումներին և այլ արտաքին քաղաքական դեպքերի զարգացումներին, քանի որ գտնում եմ, որ դրանք ավելի շատ են ազդում Հայաստանի վրա, քան ներքաղաքական զարգացումները»,- այս մասին այսօր «Անալիտիկ» կենտրոնում տեղի ունեցած ասուլիսի ժամանակ ասաց քաղտեխնոլոգ Կարեն Քոչարյանը:
«Եթե հաշվի առնենք, որ Ռուսաստանի հանդեպ կիրառվող սանկցիաները, որն ազդելու է նաև Արևմուտքի վրա, բացասական ազդեցություն է ունենալու նաև մեր երկրի վրա: Մեր իշխանություննները այս իրավիճակում պետք է խելոք գտնվեն, քանի որ շատ դժվար է լինելու: Ենթադրենք, եթե մեր երկիր երկու միլիարդ դոլարի չափով ռուբլի է մտնելու, ապա, քանի որ ռուբլին արժեզրկվում է, այդ գումարը դառնալու է 1.5 միլիարդ դոլար : Մենք չպետք է լինենք ինչ-որ մեկին նվիրված, այլ պետք է փորձենք բոլորից քաղել մեզ համար մաքսիմալ օգուտ»:
Քոչարյանը նշեց, որ Սոչիում տեղի ունեցած հանդիպումից հետո որոշ ներքաղաքական քայլեր փոխվել են և այդ քայլերը դրական են: Հարցին, արդյոք տեղի կունենան արտահերթ ընտրություններ, բանախոսը պատասխանեց. «Ես արտահերթ ընտրությունների հասարակական տրամադրություններ չեմ տեսնում, որն ամենակարևորն է: Հասարակությունը այսօր փոփոխության պահանջ չի դնում, ո՛չ իշխանությունից և ո՛չ ընդդիմությունից չի պահանջում, այլ սպասում է, թե ընտրությունների օրը երբ է գալու, որ իր հինգ կամ տաս հազար դրամն ստանա: Մեր ընդդիմությունն ու իշխանությունն օդից չեն ընկել, արժանի են մեր հասարակությանը, այս իրավիճակի համար մենք բոլորս էլ մեղավոր ենք»:
Խոսելով հոկտեմբերի տասին կայանալիք հանրահավաքի մասին, նա ասաց. «Ո՞րն է հանրահավաքի նպատակը, իշխանափոխությու՞նը: Ես Գագիկ Ծառուկյանից չեմ լսել, որ նա իշխանափոխություն է ուզում, Լևոն Տեր-Պետրոսյանից լսել եմ, սակայն նրանց կողմից իրականացվող համապատասխան քայլեր չեմ տեսնում: մի խոսքով, մեկը մյուսին արժանի են: Ամոթ է, որ Նախագահը կանչում է ՀՀԿ ֆրակցիային, որ ասի գնացե՛ք գործի: Ինձ համար ներքաղաքական զարգացումներն ուղղակի զավեշտալի են դարձել»:
Հարցին, ինչպե՞ս եք գնահատում Դաշնակցության՝ հանրահավաքին չմասնակցելու որոշումը, Կարեն Քոչարյանը պատասխանեց. «Դաշնակցությունը իշխանությունից դուրս է եկել ընդամենը մեկ պատճառով: Այս քաղաքական ուժը երբեք ընդգծված լիդեր չի ունեցել, դաշնակցությունը ուժեղ է իր կառուցվածքով և հասկանում է, որ եթե լինի հարյուր տոկոսանոց համամասնական մեծամասնություն՝ որպես քաղաքական ուժ կուժեղանա»:
