Այսօր «Անալիտիկ» կենտրոնի հյուրն էին ֆերմերներ Ռաֆիկ Պողոսյանը (Արարատ), Մեսրոպ Հայրապետյանը (Արարատ), Արմեն Թորոսյանը (Արագածոտն), Հակոբ Վարդանյանը (Արմավիր) և Վարդան Հայրապետյանը (Գեղարքունիք): Ֆերմերները բողոքում էին 2011-ին ներկրված և ֆերմերներին վաճառված էլիտար ցորենի սերմնացուի որակից, որի հետևանքները իննսունութ ֆերմերներ արդեն երկու տարի է ինչ կրում են:
Ֆերմերներ Ռաֆիկ Պողոսյանը նշեց, որ իրենք դիմել են բոլոր ատյաններին, Հովիկ Աբրահամյանը նույնպես տեղյակ է այս մասին. «Մենք հանդիպեցինք ՀՀ վարչապետի ու ՀՀ գյուղատնտեսության նախարարի հետ, քննարկեցինք այս հարցը: Սերգո Կարապետյանը ներկայացնելով իրավիճակը, ասաց, որ ֆերմերներն են մեղավոր, քանի որ Գյումրիում շատ լավ բերք են ստացել, իսկ նրանք թերացել են և չեն կարողացել ստանալ բերք: Ես այդ պահին միջամտեցի ու ասացի, որ նախարարը սուտ է ասում, այդպիսի բան չկա, սակայն Հովիկ Աբրահամյանը նկատողություն արեց ինձ ու ակնհայտ էր, որ ՀՀ վարչապետը պաշտպանում է նախարարին»:
Ֆերմերը նշեց, որ ՀՀ Սերմերի մասին օրենքում ասվում է, որ սերմը երեք տարի փորձաշրջան պետք է անցկացվի, ապա նոր տրամադրվի ֆերմերներին: Սակայն դա չի արվել և գյուղատնտեսության նախարարության սխալի համար պատասպան են տալիս իրենք. «Երկու տարի է կալանք է դրված իմ ունեցվածքի վրա, և չեմ կարողանում մշակել իմ հողը, պահել իմ ընտանիքը, բոլոր բանկային հաշիվներս կալանքի տակ են դրված, մի լումա մտնում է և միանգամից այդ գումարը տանում են: Իննսունութ շահառուների անունից պահանջում եմ, որպեսզի մեզ ազատեն այս պահանջներից, մեր վնասները չենք ուզում, միայն ազատեն, քանի որ մեր մեղավորության բացակայությունը կա: Մենք անհատապես ավելի մեծ գումար ենք կորցրել, քան պետությունը»:
Մեսրոպ Հայրապետյանը նշեց, որ շահառուներն ունեն համապատասխան փաստաթղթեր, որոնք ապացուցում են, որ բերք չստանալու պատճառը անբարենպաստ կլիման է եղել, սակայն ֆերմերները պնդում են, որ պատճառը անորակ սերմնացուն է եղել.« Ունենք ՄԻՊ-ի գրասենյակից պատասխան, որը գյուղատնտեսության նախարարությանը ասել է, որ ֆերմերների մեղքի բացակայությունը կա և նրանց պահանջից զրկեն: Նախարարությունից այցելել են մեր դաշտեր, տեսել են, որ ոչ մի կանոն չի խախտվել, մեր կողմից թերություններ չեն գրանցվել, հիմա, եթե ասում եք, որ անբարենպաստ կլիմայի պատճառով բերք չենք ստացել, ուրեմն , գնացեք կլիմայից էլ մեր փողերն ուզեք: Ոչ ճիշտ սերմափորձաշրջան է իրականացվել, որը միանգամից մեր վրա են անցկացրել: Ես ումի՞ց ուզեմ իմ փողը, դատարանները առանց խղճի խայթ ունենալու կայացնում են վճիռը, սակայն ինչի՞ հիման վրա են կայացնում այդ վճիռը, չենք էլ հասկանում: Իննսունութ հոգու անունից ասում եմ, թող մեզ կալանքից ազատեն, մեր արտագաղթը ապահովեն, մենք կգնանք այս երկրից: Հինգ միլիոն հարյուր հիսուն հազար դրամի վնաս եմ կրել: Ես հազիվ հավաքել եմ հինգ ու կես տոննա բերք, որը պետք է հետ վերադարձնեի, սակայն չեն տարել, ասելով, որ վնասել եք այդ բերքը: Նրանք ասում են, որ ծլարձակումը եղել է շատ լավ, սակայն լավ չի ձմեռել, և այդպիսով՝ բերքը վնասվել է: Ես տասը հեկտար ցորեն եմ ցանել, սակայն մի պարկ ցորեն իմ տուն չեմ տարել, որպեսզի իմ երեխան ուտի»:
Հակոբ Վարդանյանը նշեց, որ ինն հարյուր հազար դրամի վնաս է կրել. «Այսօրվա դրությամբ փաստ չունենք, որ այդ սերմնացուն վատն է եղել ու բնակլիմայական պայմանների պատճառով չէ, որ բերք չենք ստացել, փաստն այն է, որ իննսունութ հոգի տուժել են: Մենք մինչև Եվրադատարան գնալու ենք ու ամեն ինչ անելու ենք, որպեսզի արդարությունը վերականգնվի»: