Այսօր «Անալիտիկ» կենտրոնում տեղի ունեցած ասուլիսի հյուրերն էին «Հայկական Գանձեր» նոր ինտերակտիվ նախագծի ղեկավար Էմիլ Ստեփանյանը և Վլադիմիր Սոֆյանը:
Խոսելով նոր ստեղծված նախագծի մասին, որն իրենից ներկայացնում է 3D ճանապարհորդությունների շարք դեպի Արցախի և Հայաստանի պատմական հուշարձաններ, «Հայկական Գանձեր» նոր ինտերակտիվ նախագծի ղեկավար Էմիլ Ստեփանյանը ասաց. «Մենք փորձել ենք ստեղծել մի նախագիծ, որը ամբողջ աշխարհին կներկայացնի Հաայստանը, Հայաստանի մշակույթը, հուշարձանները: ժամանակը ցույց է տալիս, որ ամեն ինչ գնում է սմարթ տեխնիկայի զարգացմանը համընթաց: Հայաստանն այս շուկայում պատշաճ ներկայացված չէ, սակայն այս նախագծով մենք փորձել ենք ամեն ինչ անել, որպեսզի Հայաստանը ամբողջ աշխարհում ճանաչեն որպես թանգարան՝ բաց երկնքի տակ: Արդեն շատ դրական արձագանքներ ունենք, մարդիկ ցանկանում են գալ Հայաստան, և իրականում տեսնել նախագծում ներկայացված ինը եկեղեցիները»:
Ստեփանյանը տեղեկացրեց, որ նախագիծը շարունակելու համար հարկավոր են ֆինանսական աղբյուրներ և այժմ նախնական պայմանավորվածություն կա հեռուստամարաթոն անցկացնելու:
Նախագծի գաղափարի հեղինակ Վլադիմիր Սոֆյանը նշեց, որ մենք բազմամիլիոնանոց սփյուռք ունենք և այսպիսով, Հայաստանը ավելի հասնելի է նրանց . «Այս նախագծի միջոցով արել ենք ամեն ինչ, որպեսզի մեր սփյուռքահայերը, տեսնելով մեր պատմամշակութային հուշարձանները, գան հայրենիք, տեսնեն դրանք իրականում: «Հայկական Գանձեր» նոր ինտերակտիվ նախագիծը հետզհետե զարգանալու է, այժմ միայն Հայաստանի քարտեզն է ներկայացված, այնուհետև նաև Արևմտյան Հայաստանն էլ է ներկայացված լինելու»:
Բանախոսը նշեց, որ նախագիծը կոմերցիոն նպատակ չունի, այն ուղղված է միայն Հայաաստանի մշակույթը աշխարհին ներկայացնելուն.« Նախագծի պատրաստումը տևել է երեք տարի, այժմ ինն հատ եկեղեցի կա ներկայացված, նպատակ ունենք ներկայացնել նաև այլ եկեղեցիներ: Ունենք քանդված եկեղեցիներ, որոնց նախնական տեսքը ոչ ոք չի տեսել, սակայն այս նախագծի միջոցով ցանկանում ենք ցուցադրել նաև այդ եկեղեցիների նախնական տեսքը նույնպես, եթե համապատասխան մասնագետներ աշխատեն մեզ հետ»:
«Անալիտիկ» կենտրոնի հյուրերը տեղեկացրին, որ «Հայկական գանձեր» նախագծին ՀՀ մշակույթի նախարարությունը նույնպես օժանդակել է՝ ստուգել է տեքստերը, որոնք երեք լեզվով են ՝ հայերեն, անգլերեն և ռուսերեն:
Նշենք, որ «Հայկական Գանձերը» հավելվածը ներբեռնելու համար հարկավոր է iPhad-ով «App Store»-ից ներբեռնել ծրագիրը: Այժմ այն հասանելի է միայն iPhad-ի համար, սակայն շուտով հասանելի կլինի նաև անդրոիդներին: