«Հայաստանը անհաջող պետություն է, թե՛ տնտեսական, և թե՛ քաղաքական առումով: Եթե մենք բուն պատճառի մասին չխոսենք, ապա չենք էլ հասկանա իրականությունը: Կախված նրանից , թե մեզ ով է ճնշում, դառնում ենք նրա կամակատարը, այդ թվում նաև տնտեսության ոլորտում: ՀՀ-ն մրցունակ չէ մի քանի գործոններով, օլիգարխիան և պետությունը սերտաճած են, այստեղ օլիգարխիայի գերշահույթն է գործում: Այժմյան քաղաքականությունը պետության համար անհեռատես է , սակայն սեփական գրպանի համար շահավետ է»,-այս մասին այսօր «Անալիտիկ» կենտրոնում կայացած ասուլիսի ժամանակ ասաց կառավարման փորձագետ, տնտեսագետ Հարություն Մեսրոբյանը:
Խոսելով ՀՀ տնտեսության ներկա զարգացումների և դրամ-դոլար փոխարժեքի կտրուկ տատանումների մասին, բանախոսը նշեց.«Դրամ-դոլար փոխարժեքի տատանումների մասին շատ է խոսվում, բայց դա արտառոց երևույթ չէ, զարմանալի կլիներ, եթե տատանումներ չլինեին: Լողացող փոխարժեքը ենթադրում է տատանում, եթե մեկ շաբաթվա մեջ տատանումը երեք տոկոսը չի գերազանցում՝ որպես սպառող պետք չէ ուշադրություն դարձնել դրան»:
Հայաստանի սպառողների ասոցիացիայի նախագահ Արմեն Պողոսյանը նշեց, որ Հայաստանի տնտեսությունը գահավիժում է. «Մենք վեց տարի մոմի տակ ենք ապրել՝ առանց ջեռուցման, և դա կրկին սպասվում է մեզ: Հայաստանը տնտեսական առումով ունի ամենամեծ հաղթաթուղթը, ոչ մի երկիր էլեկտրաէներգիայի ավելցուկ չունի, իսկ մենք ունենք: Մենք ուրիշ պետություններից փող ենք վերցնում, որ երկրի կյանքը երկարացնենք, բայց ինչքա՞ն կարող ենք այսպես գոյատևել: Մեր պետության բավարար վիճակը ավելի քիչ կախված է միջազգային կառույցներից ու ավելի շատ՝ քաղաքականության ճիշտ կազմակերոպումից: Այստեղ մտածողության աղետ է, ոչ թե տնտեսության»: