««Ժամանակավոր անաշխատունակության նպաստների մասին» ՀՀ օրենքը 2014 թվականին հավանության է արժանացել, և եթե այժմ մայրության նպաստը հարյուր տոկոսով տրվում է, ապա մայրության նպաստը հաջորդ տարում կկրճատվի»,-այս մասին այսօր «Անալիտիկ» կենտրոնում տեղի ունեցած ասուլիսի ժամանակ ասաց Կանանց իրավունքների կենտրոնի ներկայացուցիչ, փաստաբան Անաիդա Սիմոնյանը:
«Փոխհատուցումը կախված է լինելու վերջին գործատուի մոտ աշխատած ստաժից և հենց դա էլ սահմանափակում է կնոջն իր աշխատանքային ստաժն ազատ ընտրելու հնարավորությունից: Այն խախտում է այն կնոջ իրավունքները, ով այժմ բարձր աշխատավարձ է ստանում: Մենք դեմ ենք այն բոլոր սահամանափակումներին, որոնք սահմանափակում են մայրության նպաստի չափը, քանի որ պետությունը չպետք է վճարի ավելի քիչ, քան կնոջ միջին աշխատավարձն է: Բոլորի համար դրանք առաջնային օրենք պետք է լինեին, սակայն Հայաստանում դա այդպես չէ: Հասարակությունը տվյալ խնդրով շատ է հետաքրքված, այս հարցը տղամարդկանց ևս հուզում է: Այժմ բողոքի ցույցեր են տեղի ունենում կառավարության, ԱԺ շենքի դիմաց, կանայք իրենց բողոքն են արտահայտում: Բազմաթիվ անգամ կառավարության ներկայացուցիչների հետ հանդիպել ենք, տարբեր առաջարկներ են հնչել, որպեսզի աշխատող կանանց իրավունքները չոտնահարվեն, բոլորը դեմ են, որպեսզի իր գրպանից հանվի և չաշխատող կնոջը տրվի: ԱԺ-ում քննարկվել է այն հարցը, որ Աշխատանքային օրենսգրքի համաձայն, եթե տղամարդը զինվորական ծառայության է գնում, ապա նրա աշխատավարձից գումար չի կրճատվում, այս դեպքում անհավասարություն է առաջանում»-հավելեց բանախոսը:
«Ընդդեմ կանանց նկատմամբ բռնության» կոալիցիայի անդամ Հայկուհի Ղազարյանն էլ նշեց, որ սա շատ կարևոր խնդիր է, քանի որ այժմ Հայաստանն այնպիսի վիճակում է, որտեղ ծնելիության մակարդակը ցածր է, և այս օրենքի կիրառմամբ՝ կինը շահագրգռված չի լինի մայրանալու: