Ինձ միշտ լուրջ հրավերներ են եղել այլ հավաքականներից, սակայն ես, լինելով մեր երկրի նվիրյալ, որևէ բան հաշվի չեմ առել, մնացել եմ մեր հավաքականում՝ անելով ամեն ինչ հավաքականի համար: Կլինեն առաջարկներ հետագայում, թե՝ ոչ, չեմ կարող ասել: Առաջիկայում հաստատ հանգստանալու եմ: Ինչ առաջարկներ կլինեն, ինչ կանեմ, դեռ շուտ է ասել: Այս մասին լրագրողների հետ հանդիպմանը հայտարարեց Օլիմպիական չեմպիոն, հունահռոմեական ըմբշամարտի Հայաստանի հավաքականի գլխավոր մարզիչ Լևոն Ջուլֆալակյանը, ով հեռանում է հավաքականից:
Արսեն Ջուլֆալակյանը, ով ներկա էր ասուլիսին, ասաց, որ շարունակելու է մնալ հավաքականում, նպատակ ունի մասնակցելու Տոկիայի 2020 թվականի Օլիմպիական խաղերին:
Արսենը նաև ասաց՝ հպարտանում է, որ Լևոն Ջուլֆալակյանի որդին է:
Ավելի վաղ ավագ Ջուլֆալակյանը ասել էր, որ իր որդու «միակ թերությունը Լևոն Ջուլֆալակյանի որդի լինելն է»:
Լևոն Ջուլֆալակյանը հայտարարեց, որ մարզչի կարիերան չի ավարտում ու սպորտում որդու հետ կլինի մինչև վերջին վայրկյանը՝ անկախ ամեն ինչից:
Ավագ Ջուլֆալակյանը չգիտի, թե ում կվստահեն հավաքականի գլխավոր մարզչի պաշտոնը, սակայն հուսով է, որ ճիշտ որոշում կկայացվի:
