Մանվել Գրիգորյանն այս պահին «Նաիրի» ԲԿ-ում է, վերակենդանացման բաժանմունքում: Առողջական վիճակում փոփոխություններ չկան: Այս մասին քիչ առաջ լրագրողների հետ զրույցում հայտարարեց Գրիգորյանի փաստաբաններից Արսեն Մկրտչյանը:
Հարցին, թե ինչու է դատախազությունը որոշել արտահերթ դատական նիստ հրավիրել և փոխել խափանման միջոց կալանավորումը, Մկրտչյանը նշեց՝ իսկ ո՞վ է ասել, որ դատախազությունն ուզում է փոխել խափանման միջոցը. «Ինձ թվում է, որ դա պատրանք է: Ես չեմ ակնկալում, որ դատախազությունը խափանման միջոցը փոխելու միտում կամ ցանկություն ունի»:
Ինչ վերաբերում է հարցին՝ այդ դեպքում ինչո՞վ կարելի է բացատրել արտահերթ նիստ հրավիրելը, պաշտպանը պատասխանեց, որպեսզի ապահովագրեն հետագայում որոշակի զարգացումներ, որոնք ցավոք կարող են լինել. «Նրանք քայլեր են ձեռնարկում, որպեսզի վատ զարգացումներն «իրենց վզին» չմնան»:
Պաշտպանը ենթադրում է, որ դատախազությունը միջնորդություն է ներկայացնելու ստեղծել միջգերատեսչական հանձնաժողով:
Մկրտչյանն ասաց, որ Գրիգորյանի վիճակը հիմա ծանր է, նրա կյանքին վտանգ է սպառնում, Հայաստանում հնարավոր բուժօգնությունը ստանում է, կոնսիլիումներ լինում է. «Սակայն մի քիչ ուշացում կա»:
Պաշտպանը նաև վստահություն հայտնեց՝ եթե Մանվել Գրիգորյանը կալանավորված չլիներ, առողջական վիճակը չէր վատթարանա: Մանվել Գրիգորյանն այսօր զրկված է զբոսանքի իրավունքից, որից օգտվում են մյուս կալանավորները:
Մկրտչյանի խոսքերով, Մանվել Գրիգորյանի գործում իրավաբանություն չկա, խոսքը վերաբերում է քաղաքական հետապնդմանը:
