«Հայկական ժամանակ» թերթը գրում է. «Հանրապետական պատգամավոր, «Ջերմուկ գրուպի» սեփականատեր Աշոտ Արսենյանն իրեն պատկանող բաժնետոմսերից 247,3 միլիոն դրամի չափով օտարել է: Դեռ նախորդ տարի մամուլը գրել է, որ ՀՀ նախկին վարչապետ, Մեծ Բրիտանիայում Հայաստանի դեսպան Արմեն Սարգսյանը ձեռք է բերել «Պեպսի-Կոլա» ընկերության բաժնետոմսերի խոշոր փաթեթ, և քանի որ «Պեպսի-Կոլայի» վաճառքը Հայաստանում կենտրոնացած է հենց Աշոտ Արսենյանի ձեռքում, այս բիզնեսը կարող է անցնել հենց Սարգսյանին: Սակայն ավելի ուշ, ՀԺ-ի թղթակցի հետ զրույցում Արսենյանը հերքել էր այս տեղեկությունը:
Բարձրաստիճան պաշտոնատար անձանց էթիկայի հանձնաժողովի կայքից տեղեկանում ենք, որ Արսենյանը նախորդ տարի թվով վեց փոխառություն է հանձնել, իր ունեցած փոխառությունները տարեվերջին հասցնելով 2,5 մլրդ դրամի, 145 հազար եվրոյի և 17,5 մլն դոլարի:
Պատգամավորի հայտարարագրած դրամական միջոցները կազմել են 1,3 մլրդ դրամ և 1,6 մլն դոլար: Արսենյանի2014 թ. տարեկան եկամուտը կազմել է 11,8 մլրդ դրամ և մոտ 1,5 մլն դոլար (ընդհանուր հաշվով մոտ 26 մլն դոլար):
Պատգամավորի կինը՝ Գայանե Մկրտչյանը, հայտարարագրել է 669 մլն դրամ դրամական միջոց: Որդին՝ Եղիշե Արսենյանը, հայտարարագրել է 232,2 մլն դրամի չափով դրամական միջոցներ, որից 207 միլինոը ձևակերպված է որպես նվիրատվություն, 22 միլինոը՝ վարկեր են, 3,2 միլիոնը՝ աշխատավարձ»:
