Այս տարվա մարտի 31-ի տվյալներով՝ Հայաստանի համախառն պետական պարտքը կազմել է 1 տրլն 883 մլրդ 092.1 մլն ՀՀ դրամ կամ ավելի քան 4,56 մլրդ ԱՄՆ դոլար: Ինչպես Analitik.am-ը տեղեկանում է ՀՀ ազգային վիճակագրական ծառայությունից, ըստ ՀՀ ֆինանսների նախարարության տրամադրած նախնական տվյալների՝ պետպարտքը փետրվարի համեմատ նվազել է ավելի քան 22 մլն դրամով, իսկ 2013-ի դեկտեմբերի համեմատ՝ աճել շուրջ 21 մլն 800 հազ. դրամով:
Մարտի դրությամբ Հայաստանի համախառն պետպարտքի 85%-ը կազմել է արտաքին պարտքը (1 մլրդ 596 մլն 895.6 դրամ), մնացածը՝ ներքին պարտքը (286 մլն 196.4 դրամ): Փետրվարի համեմատ նվազել է ինչպես արտաքին, այնպես էլ՝ ներքին պետպարտքը: Իսկ 2013 տարեվերջի համեմատ պատկերն այլ է՝ երկուսն էլ աճել են:
Արտաքին պարտքի գերակշիռ մասը կազմել է ՀՀ կառավարության պարտքը: Իսկ ՀՀ կենտրոնական բանկին բաժին է ընկել արտաքին պարտքի 206 մլն 174.1 դրամը:
Նշենք, որ 2013 թվականի դեկտեմբերի 31-ի դրությամբ Հայաստանի համախառն պետական պարտքը կազմել է 1 տրլն 861 մլրդ 265.9 մլն ՀՀ դրամ: Ըստ հաշվարկների՝ սա կազմում է 2013 թվականի Համախառն ներքին արդյունքի (ՀՆԱ) մոտ 44 %-ը:
Վերջին տարիների պաշտոնական վիճակագրությունը փաստում է` Հայաստանի պետպարտքը անշեղորեն աճում է: Եթե վերցնենք վերջին տարիների տվյալներն (դեկտեմբերի 31-ի դրությամբ), ապա կունենանք հետևյալ պատկերը.
2008 թվական՝ 584.6 մլրդ դրամ
2009 թվական՝ 1 տրլն 592.7 մլրդ դրամ
2010 թվական՝ 1 տրլն 382.9 մլրդ դրամ
2011 թվական՝ 1 տրլն 595 մլրդ դրամ
2012 թվական՝ 1 տրլն 764.5 մլրդ դրամ
2013 թվական՝ 1 տրլն 861 մլրդ 265.9 մլն
Անկախ հետազոտող, Թուլեյնի համալսարանի բիզնես-կառավարման մագիստրոս Արտակ Քյուրումյանի համոզմամբ՝ Հայաստանը սկսել է պետական պարտքի հետ կապված խնդիրներ ունենալ, երբ սկսել է ոչ արտոնյալ պայմաններով վարկեր վերցնել: Ըստ նրա՝ արտոնյալ պայմաններով տրամադրվող վարկերը քիչ հասանելի են դարձել, երբ ՀՀ-ն դասվել է միջին եկամուտ ունեցող երկրների շարքին:
Տնտեսագետների մի մասն էլ վստահեցնում են, որ պետական պարտքը սկսել է աճել նաև ազգային արժույթի արժեզրկման պատճառով:
Սեդա Հերգնյան