Հոնկոնգում 476 հազար դոլարով վաճառվել է 1978 թ. «Ռոմանե կուրտե» բուրգունդյան գինու արկղ /12 շիշ/: Այն դարձել է ամենաթանկն աշխարհում՝ հաստատելով նոր ռեկորդ, ԻՏԱՌ-ՏԱՍՍ-ին հայտնել են «Քրիսթիս» աճուրդի կազմակերպիչները:
Աճուրդի ընթացքում տվյալ լոտի արժեքը եռակի բարձրացել է նախապես սահմանված գնից: Գինին ձեռք է բերել չինացի հավաքածուատերը, որը ցանկացել է անհայտ մնալ: Այսպիսով, գինու մեկ շիշն արժեցել է մոտ 40 հազար դոլար:
Նախորդ ռեկորդը սահմանվել էր 2006թ., երբ 1945թ. «Շաթտո Մուտոն Ռոտշիլդ»-ի վեց շիշ պարունակող արկղի համար վճարել էին 345 հազար դոլար:
Հինգ տարի առաջ Հոնկոնգը վերացրել էր գինու ներկրման ակցիզային բոլոր տուրքերը, որոնք հասնում էին 40%-ի: Այդ ժամանակից ի վեր Չինաստանի այդ հատվածը դարձել է Ասիայում էլիտար բրենդների առևտրային խոշոր հարթակ և ներառվել գինու վաճառքի գլխավոր համաշխարհային կենտրոնների եռյակում՝ Նյու Յորքի եւ Լոնդոնի հետ միասին: