Արարատի մարզում գործող «Ալեքս Գրիգ», «Մխչյան ֆիշ», «էնի ֆիշ», «էկո ֆիշ» , «Յունի Ֆիշ» ձկնաբուծարանները որոնք պատկանում են ԱԺ պատգամավոր, գործարար Սամվել Ալեքսանյանին, ԱԺ նախագահ, Հովիկ Աբրահամյանին և ԲՀԿ նախագահ Գագիկ Ծառուկյանին հնարավոր չէ ամբողջությամբ լուծարեն: Այս մասին ասաց ձկնաբուծությամբ զբաղվող, ԱԺ ՕԵԿ-ական պատգամավոր Գագիկ Բաղդասարյանը՝ արձագանքելով բնապահպանության նախարարության աշխատակիցների այն հավաստիացումներին, թե սկսել են ձկնաբուծարանների ապօրինի խորքային հորերի լուծարման աշխատանքները:
Գագիկ Բաղդասարյանի խոսքով, հնարավոր է այդ ինֆորմացիայում ինչ-որ չափի հավաստիության նշույլ ունենա, բայց հնարավոր չէ տնտեսությունը ամբողջությամբ լուծարեն, քանի որ միլիոնավոր դոլարների գումարներ են ծախսվել: «Այն էլ այդ մարդկանց տնտեսությունը: Հնարավոր է՝ այդ տնտեսություններում 10 հորերից 5-ը լինեն անօրինական, դրանք կոնսերվացնեն, բայց տնտեսությունը չեն կարող փակել: Բայց որ դա փակելը տեղին է, դա միանշանակ է: Ավելին` ինչո՞ւ են նրանց թույլ տվել այդ ապօրինի հորերի շահագործումը, որ հիմա էլ փակում են»,- ավելացրեց Գագիկ Բաղդասարյանը:
Նրա խոսքով, ձկնաբուծական տնտեսություն կա , որն իր մի քանի տնտեսությունում մոտավորապես 20 հազար լիտր ջուր ունի: «Պատկերացնում եք, թե դա ինչ է: Հորեր կան, որ բնապահպանության նախարարությունը 100 լիտրի թույլտվություն է տալիս , բայց 500 լիտր ջուր են հանում: Ապօրինությունները շատ են, որոնցով վնասում են, ոչ միայն բնությանը, այլեւ այն մանր ու միջին գործարարներին ովքեր օրինական են աշխատում»,- ասաց Գագիկ Բաղդասարյանը:
