Հայաստանի գյուղատնտեսության նախարար Սերգո Կարապետյանն, այսօր՝ դեկտեմբերի 23-ին, այցելել է կաթ վերամշակող մի շարք առաջավոր ձեռնարկությունները՝ պարզելու համար, թե ինչպես են աշխատում դրանք նախատոնական առեւտրի եւ պահանջարկի 50%-ոց աճի պայմաններում: Նա փորձել է պարզել, թե բավարա՞ր են արդյոք արտադրության ծավալները, սպասվո՞ւմ է արդյոք կաթնամթերքի թանկացումներ:
Գյուղնախարարության մամուլի ծառայությունից հայտնում են, որ այցելությունն սկսվել է «Դուստր Մարիաննա» ՍՊԸ-ից, ժամանակակից սարքավորումներով հագեցած մի ձեռնարկություն, ուր արտադրվում է հանրապետության կաթնամթերքի 8-10%-ը: Այն օրական մթերում է 100-200 տոննա կաթ եւ արտադրում շուրջ 20 տեսակ կաթնամթերք:
Հաջորդը «Աշտարակ կաթ» ՍՊԸ-ն էր՝ ոլորտի առաջնեկը, որը սպառողին է տալիս հանրապետության կաթնամթերքի շուրջ 25%-ը: Այն մայիս-հունիս ամիսներին օրական մթերում է շուրջ 1000 տոննա, աշնան-ձմռան ամիսներին՝ 200 տոննա կաթ:
Կաթնամթերք արտադրող ընկերությունների տնօրենները նախարարին հավաստիացրել են, որ նախատոնական եւ տոնական առեւտրի ողջ ծավալները կսպասարկվեն բացառապես տեղական որակյալ կաթնամթերքով, թանկացումներ եւ գնային փոփոխություններ չի սպասվում:
Իր հերթին, նախարարը ներկայացրել է կաթի արտադրության ընթացիկ տարվա ծավալները, որոնք զգալիորեն ավելին են նախորդ տարվանից: Կաթի արտադրությունը շուրջ 40.000 տոննայով կգերազանցի 2012 թվականի ցուցանիշը:
Ավելացել են նաև թթու կաթնամթերքի (մածուն, թթվասեր, թան, յոգուրտ) արտադրության, ինչպես նաև՝ պանրի արտահանման ծավալները: Զգալիորեն նվազել է կաթի փոշու ներկրումը: Որոշակիորեն աճել են նաեւ կաթի մթերման գները:
Նախարարը կարևորեց նաև սանիտարահիգենիկ պայմանների եւ որակի ապահովումը, որն ըստ նրա, բավարար է:
