2014թ. Հայաստանում 5 նոր սպանդանոց կբացվի, երեքը՝ «Հալալ»-ի ստանդարտով: Այս մասին դեկտեմբերի 25-ին լրագրողներին հայտնել է գյուղատնտեսության նախարար Սերգո Կարապետյանը:
Ցավոք, հանրապետությունում անասուններին հիմնականում ագարակների բակերում են մորթում: «Սանիտարական չափորոշիչներին համապատասխան նոր սպանդանոցները կբարձրացնեն մեր երկրի պարենային արտադրության անվտանգությունը», - հայտարարել է Կարապետյանը:
Բացի այդ, Հայաստանը կարող է ավելացնել մսի արտահանումը մահմեդական երկրներ, այդ թվում՝ Իրան:
Ընդ որում՝ հանրապետության ներսում մսի անբավարարություն հազիվ թե ծագի, հավելել է նա:
«2-3 տարի առաջ դրա համար լուրջ անհանգստանում էին, թե իբր բոլոր ոչխարներին այստեղից Իրան կտանեն: Բայց այս ընթացքում գլխաքանակն, ընդհակառակը, ավելացել է: Բնական է, որ մարդիկ եկամտի հնարավորություն են տեսնում: Իսկ հիմա նման հնարավորություն է ընձեռվում. բացի կենդանի անասուններից, արդեն կարող ենք միս արտահանել», - հայտարարել է նախարարը:
Նշենք, ՊԵԿ-ի տվյալով՝ 2013թ. Հայաստանից փոքր եղջերավոր անասունների (հիմնականում ոչխարների) արտահանումը հունվար-սեպտեմբերին կազմել է 62,9 հազ. գլուխ ինչը 1,4 անգամ ավելի է 2012թ. հունվար-սեպտեմբերի ցուցանիշից: Այդ գլխաքանակի մոտ 90%-ն արտահանվում է Իրան: