«Էյ-Ի-Ջի Սերվիս» ՍՊԸ գլխավոր տնօրեն Արսեն Հարությունյանը այսօր հրավիրված ընդլայնված խորհրդակցության ժամանակ ամփոփելով 2013 թվականի գործունեությունը` ընդհանուր առմամբ դրական է գնահատել ընկերության կողմից իրականացված աշխատանքները:
«Հայռուսգազարդի» մամուլի ծառայության փոխանցմամբ, տարվա ընթացքում 648.000 բաժանորդի մոտ ներտնային գազասպառման համակարգերի տեխնիկական սպասարկման մասով իրականացվել է 1մլն. 200 հազար պլանային այց և 8000 արտապլանային սպասարկում:
Ամփոփիչ տվյալների համաձայն բաժանորդների մոտ տեղադրված անվտանգության ազդանշանային սարքերի գործարկման արդյունքում կանխվել է ավելի քան 1100 դեպք: Ներտնային տեխնիկական սպասարկման եւ կանխարգելիչ միջոցառումների արդյունքում այդ դեպքերը զգալիորեն նվազել են՝ 2012 թվականին ունեցած 2200-ի համեմատ: Նախորդ տարիների համեմատ նվազագույնին են հասցվել նաեւ կենցաղում բնական գազից թունավորման եւ մահացության դեպքերը:
Ըստ Ա. Հարությունյանի, ոլորտում իրականացվող աշխատանքներն ու ձեռնարկված քայլերը լուրջ նախադրյալներ են ստեղծում ներտնային գազասպառման համակարգում անվտանգության բարձր մակարդակ ապահովելու համար: Սակայն արձանագրվող դժբախտ դեպքերն ու պատահարները դեռ մտահոգության տեղիք են տալիս եւ առաջ քաշում գազօգտագործման անվտանգության կանոնների հրահանգավորման եւ իրազեկման լրացուցիչ միջոցառումների անհրաժեշտություն:
Ա. Հարությունյանը 2014թ. հայտարարել է «Սպասարկման որակի բարձրացման տարի» և ընդգծել, որ իրականացվող բոլոր ծրագրերը պետք է նպաստեն «Էյ-Ի-Ջի Սերվիս» ընկերության կողմից մատուցվող ծառայության որակի բարձրացմանը եւ նպատակաուղղված լինեն բաժանորդների անվտանգության ապահովմանը:
Խոսելով 2014 թվականի անելիքների մասին Ա. Հարությունյանը նշել է նաեւ, որ նոր պայմանագրով ստանձնած ջրային երեք ընկերությունների կառավարման աշխատանքները պետք է շարունակել ավելի բարձր արդյունավետությամբ՝ հատուկ ուշադրություն հատկացնելով մատուցվող ծառայությունների որակին եւ կառավարման համակարգի բարելավման գործընթացներին:
Ամփոփելով անցած տարին, Ա. Հարությունյանը Ընկերության ստորաբաժանումներին հանձնարարել է ներկայացնել 2013թ. հաշվետվությունները, ինչպես նաեւ 2014 թվականի համալիր ծրագրերը: