Իրանի իշխանությունները երկրի միջուկային ծրագրի շուրջ Արևմուտքի հետ եկած պատմական համաձայնության շրջանակներում արտասահմանում սառեցված հաշիվներից 550 մլն դոլար կստանան։
Ինչպես հայտնում է Al Arabiya-ն՝ Reuters-ին հղումով, արևմտյան պատժամիջոցների պատճառով Իրանն արտասահմանում սառեցված հաշիվներին ընդհանուր առմամբ 4.2 մլրդ դոլար ունի, որոնցից տևական ժամանակ չի կարողանում օգտվել։
Այդ գումարից 550 մլն-ը Թեհրանը կստանա փետրվարի 1-ին, իսկ մնացած մասը՝ մինչև հուլիս։
Հիշեցնենք, որ 2013թ. նոյեմբերի 24-ին ժնևյան բանակցությունների շրջանակներում Իրանն ու միջնորդ «վեցյակը» համաձայնվել են ժամանակավոր դադարեցնել Թեհրանի վիճահարույց միջուկային ծրագիրը, ինչի դիմաց Արևմուտքը խոստացել է վերացնել կամ էլ մասնակի թուլացնել իսլամական պետության դեմ կիրառվող պատժամիջոցները։ Այժմ հայտնի է, որ համաձայնագիրն ուժի մեջ կմտնի հունվարի 20-ից։
