Վրաստանի վարչապետ Իրակլի Գարիբաշվիլին կդիտարկի Աբխազիայում արագ սննդի McDonald’s ռեստորաններ բացելու հարցը: Այս մասին հայտարարել է վրացի գործարար Թեմուր Չկոնիան՝ վարչապետի հետ հանդիպումից հետո:
«Վարչապետը խոստացել է, որ մանրամասն կուսումնասիրի այդ թեման եւ կպատասխանի ինձ: Կդիտարկվեն հարցի քաղաքական եւ իրավական կողմերը», – ասել է գործարարը, հայտնում են վրացական լրատվամիջոցները:
Վրաստանում McDonald’s-ի սեփականատեր Չկոնիան ընդգծել է, որ առանց իր թույլտվության հանրապետությունում արգելված է արագ սննդի ռեստորանների կառուցումը:
«Նույնիսկ եթե քարտեզ գոյություն ունենար, որտեղ Աբխազիան անկախ նշվեր, միեւնույն է, այնտեղ McDonald's պետք է ես կառուցեմ, կամ էլ պետք է կառուցվի իմ թույլտվությամբ», — ընդգծել է գործարարը:
Ավելի վաղ Չկոնիան հայտնել էր, որ ծրագրում է McDonald's բացել Աբխազիայում, եւ որ մտադիր է համապատասխան բանակցություններ սկսել տեղի իշխանությունների հետ՝ Սոչիի օլիմպիադայից հետո:
«Coca-Cola Bottlers Georgia» ընկերության հիմնադիր գործարարը ցանկանում է Աբխազիա ներմուծել նաեւ «Coca-cola» ընկերության արտադրանքը, որը, իր խոսքով, այժմ ապօրինի այնտեղ է հայտնվում Ռուսաստանից:
Ըստ վրացական օրենքների՝ առանց Վրաստանի կառավարության թույլտվության Աբխազիայի տարածքում ցանկացած բիզնես արգելված է: